Июньдалул 2-нний Халкьуннал хозяйствалул университетраву ДР-лул аьрщарал ва хъуслил арардал министр Заур Эминов хьунаавкьунни республикалул журналистътуращал, блогертуращал ва жяматийсса вакилтуращал. Хьунабакьаврил мурадгу бия 5 зурул мутталий цала дурсса давурттая ва щаллу бан бакIрайн лавсъсса мурадирттая бусансса. Министрнащал бия ванал хъиривчутал, министерствалул отделлал каялувчитал ва пишакартал.

Заур Эминовлул бусаврийну, цува ва къуллугърай ивтуния шинай, щала министерствалул гуж цачIун бувну, вай 5 зурул мутталий дурну дур республикалул аьрщарал ва личIи-личIисса идарарттал инвентаризация. Ва давугу вайннал дурну дур Сергей Меликовлул республикалий ишла дан ккаккан дурсса аьрщив цуми тIайлану ишла дуллай бу­ссарив ягу мюнпат къаласлай кьариртун дуссарив ххал дан тапшур баврийн бувну. Инвентаризация даврийну кIул хьуну бур жулла республикалул хъуслин ккаллисса 4 азаллий 906 аьрщи душиву халкьуннахьхьун дуллуну. Миннува так 1500 аьрщи ларсун дусса дур кьутIилул гьанулий. Вайннувагу азардаксса кьутIи дусса аьрщив арендалий ларсун, хIукуматрал чулухасса кумагругу, субсидиярттугу ласлай бунува, буржру хьуну, республикалул хазналувун ма­хъуннай цукунчIавсса налогру къадуллусса дур. Аьмну арендалий ларсъсса аьрщарах, ми ишла дуллалисса халкьуннал налогирттах булун бусса бур 250 млн арцул.
Заур Эминовлул мукунма кIицI бунни, инвентаризациялул лагрулий республикалул аьрщив дакъасса, цала федерал ва муниципалитетирттал аьрщивгу чув циксса ци дурив-дакъарив ххал дуршиву.
– Ва даву дурну махъ жу муниципалитетирттал каялувчитурахь маслихIат барду, сакин бувну цачIа-цачIава хасъсса комиссияртту, миннайн тапшур бан, дачIрасса, ишла къадуллалисса аьрщив циксса дуссарив ххал дурну, ца низамрайн буцин. Му даврийну, миннан цанма чIалантIиссар чув ци социал объектру биял къахъанай буссарив, ци идарартту бан багьлай буссарив ва инвестициярттал майданну сакин бан бюхълай буссарив цащава», – увкунни министрнал.
Республикалий цанма ччи-ччикун ишла буллалисса ГУП-рал бакIрачIан ци бучIантIиссар тIисса суалданухьхьун жаваб дуллай, Заур Эминовлул кIицI бунни республикалул циняв ГУП-ру 2025 шинайннин лакьинтIишиву.
Ванал бусаврийну, Дагъус­ттаннай бусса бур 17 ГУП. Вайннухь дусса дур аьрщарал 67 азарда гектар. ГУП-ру лакьаврил хъунмур багьанагу бусса бур вайннуя хайр бакъашиву. Масалдаран, 2020 шинал вайннуясса маэшатрах республикалул хазналувун дуркIун дур дурагу 829 азарда къуруш арцул.
Заур Эминовлул кIицI бунни хайр бакъасса ГУП-ран кIа­­най, республикалий сакин дантIишиву аьрщив тIайлану ишла дуллантIисса ва миннуя мюнпат ласлантIисса цайми сакиншиннарду. Ва ттигу хъирив лаллантIисса масъалар.
Ларгмур нюжмадий Сергей Меликов Къизлардал ва Бабаюртуллал зонардайсса зунттал районнал кIинтнил минардал къутаннай ва шяраваллаву ялапар хъанахъисса халкьуннащал хьунаавкьуну махъ ци дахханашивуртту хьунтIиссар тIисса суалданухьхьун жаваб дуллай, Эмировлул кIицI лавгунни циняр давуртту дуллай сукку хьунтIишиву цIусса Халкьуннал Мажлис сакин бувну махъ ва цаятува ванал ххи бунни школартту, социал объектру бусса, 40-50 шиннардий ца кIанай ялапар хъанахъисса инсантуран, хаснува гикку дуклакисса оьрчIру ссуссукьу къабувну, ххуйсса кIулшивурттугу, лайкьсса шартIругу дузал дан аьркиншиву ва заманнай циняр давуртту дуллантIиссар халкьуннах вичIи дирхьуну, цавайнналлагу ихтиярду лиян къадансса хIарчатрай.
Журналистътурал буллалисса суаллу бия республикалул туризмалиягу, цIинцI-ччюрк дичлансса полигоннаягу, хьхьирил зумардай дурсса хъуни къатрая ва мюнпат-хайр бакъа дурну дацIан дурсса къатраягу.
Вай суаллахьхьун балжийсса жавабругу дуллуну, министрнан кIицI бунни журналисътурал ва жяматрал вакилтурал гьаз буллалисса масъаларттал хъирив лавну, хIадурну бушиву цачIуну зун.