Июнь зурул 18-нний ДР-лул ХIукуматрал Председатель гьуртту хьунни ДР-лул Халкьуннал Мажлисрал 60-мур сессиялий. АьбдулпаттахI Амирхановлул кIицI лавгунни Дагъусттаннал парламентрал ххюра шинал лажиндарай, политикалул дикIу, экономикалул дикIу арардаву дурсса давурттал, хъунмасса кабакьу бувшиву региондалул ихтиярдал системалул даву магьир даврицIун.
– ЦIанакулсса депутатътурал корпусрал хъуннасса гьурттушинна дуллай бур экономика ва социал сфера хьхьичIуннай давриву, законнал ва цIушиннардал давриву шилтагъшиву хьун къаритавриву. Махъсса ххюра шинал лажиндарай зул кумаграйну кьамул дурссар республикалун мюнпатсса агьамсса законну, 100-ннийн дирсса законодательный актирдаву хьун дурссар дахханашивуртту.
Зу дуллалисса агьамшиву ххисса давурттуну хъанахъиссар законнал сиптарду иширайну зузи даву, социал объектру, ххуллурду баврил давуртту, терроризмалийн ва экстремизмалийн къаршисса давуртту дачин даву, – увкунни премьер-министрнал.
ДР-лул БакIчи Сергей Меликовлул тапшур баврийн бувну, АьбдулпаттахI Амирхановлул депутатътуран дуллунни хIукуматрал наградартту.
«За заслуги перед Республикой Дагестан» тIисса орденну дуллунни ДР-лул Халкьуннал Мажлисрал председательнал бигарду биттур буллалисса СайгидахIмад АхIмадовлун ва ДР-лул Халкьуннал Мажлисрал вице-спикер Камил Давдиевлун. «За доблестный труд» медаль дуллунни парламентрал председательнал хъиривчу МахIмуд МахIмудовлун.
Мукунна цаймигу депутатътуран дуллунни ДР-лул ХIурматрал чулухасса грамотартту, Республикалул БакIчинал цIа кусса ссятру ва «ДР-лул лайкь хьусса экономист», «ДР-лул лайкь хьусса строитель» тIисса бусравсса цIарду.
Аьжа Бажаева
