Росгвардиялул зузалтралгу лавхъунни чирахъру

Буттал кIанттул цIанийсса Хъунмасса дяъви байбивхьусса Аьпалул ва хIасратрал кьини щалагу Аьрасатнаву байсса «Аьпалул чирахъ» патриот акция МахIачкъалаливгу хьунни.

Акциялий гьуртту хьунни Аьрасатнал Виричу, Да­гъусттаннал Росгвардиялул Управлениялул хъунама МахIаммад Баачилов ва ведомствалул зузалт. Акция хьунни Лениннул Комсомолданул цIанийсса паркраву ва Педуниверситетраву.

Мероприятиялий гьурттушинна дунни Да­гъусттаннал ХIукуматрал Председатель АьбдулпаттахI Амирхановлул, ванал хъиривчутал Рамазан ЖахIпаровлул ва Муслим Телякавовлул, виваллил иширттал министр, полициялул генерал-лейтенант Аьбдурашид МахIаммадовлул, Жагьилтурал министерствалул, МахIачкъалаллал администрациялул, республикалул жяматийсса ва ветерантурал организацияр­ттал вакилтурал, дуклаки оьрчIал.

Акциялий гьуртту хъанахъиминнал тIутIив дирхьунни Аьраличунал гьайкалдануцI, Совет Союзрал Вирттаврал Аллеялий, мукунна дяъвилул чIумал ливтIусса учительтуран­сса гьайкалдануцI.

Лавхъсса чирахъру бивхьуну, вайннал чивчунни «Помним» тIисса махъ. ЛивтIуминнал аьпалун баян бунни минутрайсса пахъ багьаву. Хъирив искусствалул школалул  оьрчIал ккаккан дунни «Кьурукьру» къавтIаву. Яла цинявппагу мероприятиялий  гьур­тту хъанахъиминнал ливтIуминнал аьпалун итабавкьунни гьаваллавун кIяласса шарду.
– Буттал кIанттул цIанийсса Хъунмасса дяъвилул щавщи къабивсса цавагу кулпат бакъахьунссар жучIава.Та дяъвилул кьариртсса къюву тачIав хъама къаританссар жула халкьуннан. Ватан дуручлай жанну дуллусса вирттал жунма абадлий дакIний бикIантIиссар, – увкунни МахIаммад Баачиловлул.

Амина Юсупова, ДГУ- лул журналистикалул отделениялул студентка