Аьрали жамирдал ликказандарай
Ларгсса тталаткьини Дагъусттаннайн увкIунни Аьрасатнал мюхчаншиврул министр Сергей Шойгу. Вара кьини Дагъусттаннал хъунама Сергей Меликовлущал ва ивунни Каспийскалий аьрали жамирдал ликказан дусса кIанайн, ххал бивгьунни тикку буллалисса объектру. Жамирду бацIайсса пункт «Каспий» щаллуну бувну къуртал бувайхту, тикку ххюцIалунниха ливчусса аьрали жамирду бикIавантIий бур. Сантирай най дур Каспийскаллал флотилиялунсса объектру буллалисса давугу.
Ашттарханная Каспийскалийн хьхьирил флот бизан бувансса хIукму бувссия Шойгул 2017 шинал Мюхчаншиврул министерствалул коллегиялий, Каспий хьхьири микIкъалачIайну тIий, шиккун бизан баву къулайну ккавккун.
