Дагъусттаннал БакIчинал къуллугъ чIумуйну бартбигьлагьисса Сергей Меликовлул Дагъусттаннал агьалинайн коронавирусраща буруччиншиврул прививкартту дувара тIисса оьвчаву дунни, махъ ппурттуву республикалий коронавирусрал къашавайми ялу-ялун гьарзагу хъанай бухьувкун.

«Жунма уттигу ковидрал къашавайминнансса кIанттурду азарханардай гьарза буллан багьунни, цуксса кьурчIинугу, инсантал ххассал буван къахъанахъисса ишру хъанай бур. Ва иширал жунна дакIнийн дутлай дур шинал хьхьичIсса чIунгу: агьалинал къатравун бала бувхсса. ДакIнийн бутияра, циксса чIявусса, жунма ххирасса инсантурацIа хьуссарув жува му бала сававну. ДакIнийн бутияра жущава ми ахиратравун тIайла букканмагу хъанай къабивкIшиву.

Лажиннича, жува локдаун, дистанцион журалийсса дуккаву, удалёнкалий зузаву зана хьун ритантIиссарив?
Ччанссарив жунна, цIуницIа шаппа-шаппа щябивкIун, давурттайнгу занан къахъанахъи­сса, жулва оьрчIангу дуниял так чIавахьулттивух чIалачIисса тагьар зана диркIун? Дагъус­ттан пандемиялул ппурттуву яла къия дирмур, яла щавщи бивмур Аьрасатнал регионъяхха! Жунма чIявусса ккавккунни, опыт ласунуксса, бакIрай бацIан, пикри буван аьркинни», – увкунни Меликовлул видеолийсса оьвчавриву.

Ванал мукъурттийн бувну, так вакцинациялулли коронавирусрал эпидемия дацIан дувантIисса. Цамур ххуллу ба­къассар.
«На зуйн оьвтIий ура, азардануща ххассал буван къавхьуну ливтIуцириннал аьпалун, гихунмай оьрмулия ххарину яхъанан аьркинсса жулвацириннаха аякьалий, прививкартту дувара тIий. Ва лавмарт азарданун ххуллу кьукьинсса чаран бур, му чаран бушивугу хъунмасса тIайлабацIур, цуксса анаварну ппив хъанай духьурчагу, жущара му дацIан дуван хьунтIий бур», – т1ий ур Республикалул хъунама.

Ва маслихIат буллай ур вакцинартту заралссар тIисса тIардайн ва гьану бакъасса хавардайн вих къахъанан. Вакцинартту баву хушрай дувайсса даву духьурчагу, ми бува-къабуваврия хъар хъанай бур жулва бучIантIимур, лагма-ялттуминнал цIуллушиву, мюхчаншиву, аьмну Аьрасатнал агьалинал мюхчаншиву. Жуйнма-жуйнмалу багьайсса иш бакъахьувкун, вай кIанттурдугу хIисавравун лавсун, ичIувацириннал, лагма-ялттуцириннал, архIал зузиминнал пикригу бувну, чIал хьуну лякъиннин, вакцинартту бувара, зулва оьрмугу, зулвацириннал оьр­мурдугу ххассал бувара тIий ур.