Уттигъанну чIун дакъасса бивкIулул жуятува личIи унни ГьунчIукьатIрал шяраватусса ХIажинал арс Мудунов Апанни.
Апанни увну ур 1951 шинал, бусравсса ХIажинал ва Гьидаятлул кулпатраву. 1973 шинал ванал къуртал бувну бур Дагъусттаннал политех институт, зун увххун ур КъюмайтIутIи ххяххан баврил ва чяхир даврил НИИ-лийн. Апанни, 1982 шинал аспирантурагу къуртал бувну, диссертациягу дурурччуну, элмурдал кандидатнал цIанин лайкь хьуссар.
Пенсиялийн укканнин Апанни зий уссия Дарбантуллал чахир ва коньяк дай заводирттай технологну.
Апаннинан ляличIину ххирая цала Буттал мина – ГьунчIукьатIрал шяравалу ва жямат. Шяраваллил агьулданул зунттаву бикIу, шагьрурдай бикIу, ванайн вихшала дишайссия агьамми щарнийн багьайсса, иширттаха зун. Апанни уссия «Общество Унчукатль» ккурандалул хъунаманал хъиривчуну ва «Унчукатль» фондрал бакIчину. Ва чялишну гьуртту шайссия щарнил жяматрал сакин дурсса циняр давурттаву.
Жяматрал кьинирду хIадур дайсса, Буттал кIанттул цIанийсса Хъун дяъвилийн лавгсса вирттаврал аьпалун «Аллея Славы» багъраву мурхьру бугьаврил, шяраваллил тарихран хас бувсса ва шяравучутурал назмурдал луттирду бищун хIадур буллалисса сиптачитурал ккурандалул хьхьичIунсса гьурттучинугу ва уссия. ХIайп тIий буру Апаннинан цала хIадур бувсса «ГьунчIукьатIрал назмурду» тIисса луттирал мужаллатру къаккаккансса.
Ванал буссия жяматращал архIал чIярусса давуртту дансса пикрирду. Шяраваллил цIаний Апаннинаща дан къархьумур ванал уртакьтурал ва шяравачутурал данссар тIисса умуд бур.
Апаннинал бувсса захIматгу, ванал тIиртIусса дакIгу, аькьлу-кIулшилийсса махъругу жун мудангу дакIний личIантIиссар.
ДакI-аьмал ххуйсса, хIал бавкьусса Апанни ххирасса икIайва шяраваллил жяматран ва архIал зузиминнан. Ва дакIнийн утлай, ванаясса хъинсса аьпагу, ванал бусравсса цIагу цал ххишалану зумух ласун ччива ванал кулпатращал, оьрчIащал, гъанцириннащал архIал.
Апаннинал бивкIулул кьурчIишиву кIидачIлай, дакIнийхтуну жижара буллай буру ванал ниттихь Гьидаятлухь, кулпатрахь Фатимахь, арсваврахь Амирдухь ва Тимурдухь, душнихь Загидахь, ссихь Зумрутлухь, уссурваврахь Шамиллухь ва Оьмардухь, махъсса гъан-маччанахь, щалагу агьлу-авладрахь. Апаннинал барачат махъ ливчIун лякъиннав. Зул ляхъиндарай оьрмулул увччуну акъа цучIав дунияллия къагьаннав. Миннал оьрмурду лахъи баннав.
Апанни имандалий лавгун лякъиннав. Цал бунагьирттал аьпа баннав, рухI бигьаний дишиннав, алжаннул ххари аннав, Амин!
ГьунчIукьатIрал ккуран
Аьлиллул арс Кьаландара
Уттигъанну, оьрмулул 73 шинаву, аьпалухьхьун лавгунни Къурлатусса Аьлиллул арс Кьаландара. Увну ур ва 1948 шинал Къуруллал шяраву. Хъунав ацIва классгу къуртал бувну, увххун ур Дагъусттаннал медициналул институтравун. ХьхьичIунну къуртал бувну институтгу, зун гьан увну ур Чачаннавун, Ишорский райондалийн. АцIра шин дурну дур му райондалий зий ккарччал духтурну.
Яла зана хьуну ур Дагъусттаннайн, зун ивкIун ур мува пишалий Каспийскаллал поликлиникалий.
Кьаландара ия Лакку кIану ххирасса инсан. Дуруна цала буттал шяраву къатри. Гьарца шинал, душнил оьрчIругу бувцуну, лагайссия Лаккуйн. КIиягу душнил арсгу увххунни медакадемиялувун.
Кьаландарал бивкIулул пашманшивугу кIидачIлай, дакIнийхтунусса жижара буллай буру ичIувацириннахь, махъсса цинявппагу гъан-маччаминнахь. Цал гьав нурданул дуцIиннав, алжаннул ххари аннав.
Кьаландарал дустурал
ва гьалмахтурал цIанияту
Оьмаров ХIасан
ДакIнийхтунусса жижара буллай буру жула даврил уртакь Аьбдуллаев Аминнухь, ванал ссил арс
Мудунов Апанни ХIажинал арс
аьпалул шаврийн бувну.
Апаннинал бунагьирттал аьпа буваннав, ванан бакъасса оьрму махъминнан булуннав, рухI хъинний дишиннав.
«Илчи» кказитрал коллектив
ДакIнийхтунусса жижарагу буллай, къумашиву кIидачIлай буру жула даврил уртакь Х1ажиева Зинфирахь, ванил ниттиуссу
Штанчаев Шамил МахIаммадлул арс
аьпалул шаврийн бувну. Шамиллул барачат махъ ливчIун лякъиннав, ванан кьисмат къадурсса оьрмулул шинну ванан ххираминнан дулуннав Хъунасса Заннал.
«Илчи» кказитрал коллектив
