Жул редакциялул ххаллилсса зузала, ас-намусрал бувччусса инсан, МахIаммадлул душ Загьрани Аьбдуллаева аьпалухьхьун лавгун вай гьантрай бартларгунни шин. ЧIун цуксса гьарчагу, Загьрани жун биял къахъанайнма личIантIиссар мудангу.
«Илчи» кказитрал коллективрал оьрмулуву, цийнна дагьайсса корректорналмур даву дакъассагу, жул даймуниву, дитаймуниву чялишну гьуртту шайсса инсанъя Загьрани.
Ванил биялсса бюхъу бия шеърирду, шаммарду ляхъан баврил, чичаврил чулухагу. ЧIун-чIумуй ми бищайссия жула кказитрайгу, буккултран кIулссар, бувккуссар.
Загьрани жула дянив бакъа там хъанахъисса шинал пашмансса кьинилуцIунгу бавхIуну, ва номерданий ришлай буру ванил назмурдавасса цаппара.
Цил бунагьирттал аьпа баннав!
ЦIусса шин
Ча дуркра жучIан, ЦIушин,
ЦIу хияллал дурцIу шин,
КIинтния дайдирхьуну,
Мукьра чIумуйх дачIай шин.
Жуннийн ина кьутI чара,
ОьрчIру ххари бувара,
Вилва микIирал пилчлух
Пюрунтру чIюлу бара.
Вия дайдишай ЦIушин,
Гихуннай ккуру най шин,
Ихтияр дула чIа чин
ДакIнин малхIан хьунсса шин:
Ина жу мугъаят ба,
Жул оьрму барачат ба,
Оь чан ба, ттявх-пIякь чан ба,
Зузинал кисри ганз ба.
Зарзала жуя арх да,
Гьавалул тагьар ххуй да,
Дагъусттаннал багъ-бахча
Ина тIутIайх бичин ба.
Хъуниминнал дакIурдий
Хъинми хIукмурду цIакь ба,
Аьрасат ва Дагъусттан
Маэшатрал абад ба.
Жул жяматрал иялчу
Дядя-Мусан хасну
Мискин хьунни жул щар ина лавгун махъ,
Дурккунни эяллайн хъиннура гужну.
Муси гьар кIанайгу пар тIий дикIайссар,
Кьадарминнан кьимат чIумул бищайссар.
Щялмахъ, щулсса къеллу къаччисса ияв,
Ххуймунил, аькьлулул кьимат лахъ байва,
Шяраву, чIаххуврай итххявх жагьилтал
Кказитрайх барча бан хьхьичIунай шайвав.
МарцIну захIмат бихьлай, ччатI канай ияв,
Арс Идрисгу увна мукун тарбия.
ОьрчIал оьрчIру дуклай кьатIух бунугу,
Ттатта ия миннан мудан эбратну.
ТIайламур тачIавгу пуч буван къашай,
Къанихми, дацайми ссалчIав къабуччай.
ЖухIишиву дакъа, марцIну зузинан
Тава-тагу ххуллу Заннал тIитIин бай.
Алжаннул къапурду вин тIивтIухьунссар,
Аьрщарай узданну оьрму бувтун тIий,
Вил рухI ххари дуван ччясса мутталий
Хъунасса Занналгу кабакьинтIиссар.
Ниттихъал угьру
Дувссилул угьру бур дакIнива личлай,
Нину дур къагъ ларгун,
аьтIун къахъанай,
Гъанцири банд лавгун,
цичIав къабувчIлай,
ТIааьн бакъа хавар ирсирай баллай.
Чунну ва мугьалттул лавсун нанисса,
Жагьилсса жаннацIа арсру буллайсса?
Арсрурив кIукIлусса, бувснийх нанисса,
Заманарив оьсса, луркIан дуклайсса?
Зал, вийн леххавур жул, тIайла бацIан ба,
Ниттихъал захIматрал кьиматру лахъ ба,
ОьхIалмур дакIнийнал
дакI микIлачIун да,
Дунияллий оьрму тIутIайх бичин ба.
Заннахь дакъа, щихьри дусса?
Заннахь дакъа, щихьри дусса
Жан ласунсса кьудрат-кьанун,
Цанни гьарца къачагъ-къавкъин
Заннал кIану бугьлагьисса?
Багьана дан – бусурман дин,
Аслан-кайп хьун – тариякру,
Ва ци оьрмур, ххуйсса оьрчIру
Аьтарттувух бявххун найсса.
Зул жагьилшиврул багьасса
Цири дусса дунияллий,
Якьут, алмазру, ттиркьюкьив
Хьхьирил ласун дуллалисса?
Бивщуссарив
цIарал лама?
Сагидлул аьпалун
ТалихI чIа тIий жу вин буна,
Бивщуссарив цIарал лама,
Гъав ларгссарив тти вил лажин,
Ччаврих лавсъсса чIавалачин?
Загьрулул бувссарив оьтту,
Ятинтал хьуссарив оьрчIру?
Тяхъа симан, жагьилсса жан,
Нясив бувссарив вин алжан?
Вил арсру бур хъуни хъанай,
Вия цIухлай, дакIнийн утлай,
Вил рухI тIурчан, миннал ялтту
Ххютну лехлай, мюхчан буллай.
Вил нину дур хъяхъа чавай,
Вирдай аьтIий, бикъав пиш тIий,
Нюжмар хьхьурдай вищал жапрай,
Ахират бигьа хьуннав тIий.
Ттул эшкьилул кьадру бакъа
Маххаххара, ххазинай,
ДакIнивун ххюва битлай,
Жавгьардал чIатIаракIру
ТIайланна къюкIлийн ритлай.
Вил чIу – ттул вичIан дарман,
Жавгьарду – няран дарман,
Чурххал оьвхъу-хъалашив –
Ттул дикIул дакIнин дарман.
Ина ургарчан зунххи,
Дуниял лагай лухIи,
Бищурчан бявкъусса марч,
Ялун нани хханссар занч.
Ттух ляличIину битай
Ми яруннил жавгьарду,
Цамуних урав битлай,
Ттул ччаврил кьадру бакъа?
Ци бави хасиятран
Хасият малхIанминнай
На шара мудан хIайран,
Амма ттулла хасият
Дан къашай ттуща малхIан.
ХIакьину вищал ттярзлий,
Гьунттий танащал ттярзлий,
Сарану ва дуниял
Щаллара ттущал ттярзлий.
Вари ттул дакIнил тагьар,
Даххана къашай тагьар,
Ттуйхрагу кьини дуклай,
Бан цичIав къашай тагьар.
Инт дуркIунни
Инт дуркIунни, хъув бувккунни,
Уртту-тIутIи сукку хьунни,
Марххалттанил баркьутрала
Дараччилул тIитIу бунни.
Ущу-щулгъи чантI увкунни,
Интнил кьункьал бувччу бунни,
ЧIал къавхьуну, кюртти буллай,
Чутру хьуну занантIиссар.
Цаярда кIилий хъунисса
Дукия ххюрхху дантIиссар.
Дуланмагърал хъирив хъанай,
Бикъавт манзил къабитайссар.
Ччикку бувккун, ккивкку тIунссар,
Гъарал чIа тIий булукьинссар.
Гьаннайх, къурух ччиккул тIутIив
Хъахъи ларххун дачинтIиссар.
Лухччинул чIан дуцIинтIиссар,
Ризкьи урттул буччинтIиссар.
Хъуруннай дургьу нувщи-къур
ТIутIан ларххун дачинтIиссар.
Къурув лачIа лахъ хьунтIиссар.
Марч бивщуну, лачIал хъуру
ЩатIан лащан дувантIиссар,
Къакъунт къурух занантIиссар.
Инт гъинтнихьхьун ссалам буллай,
Гьава кIири хъанантIиссар.
Ялу-ялун уртту-щингу
Гъарал щинал дучлантIиссар.
КIинтнил хасият кьянкьассар,
Дякъил лухччи хъя чин дайссар,
Бувну хъунисса марххалтту,
Буруккинтру ххи бувайссар.
Лухччинул кIяла лаххайссар,
Щинал накьичру дишайссар,
ВацIлул паччахI, цушагума
Хьхьуцанттув шанаши байссар.
РухI дусса зат хьхьурай кьатIув
Ялгъуз-гъаривну личIайссар,
КIинтнил пикри гъинттулва бан
Аькьлу бунан аьркинссар тIар.
Шинал мукьрагу чIун
Дяркъу кьянкьа кьурукIинтнил
Базу-базу лякIин буллай,
Гьунттий кьинилул пикрирдай
Шанмагу барз ккуру гьан бай.
Инт кIинтнищал ччалан дикIай,
Ахиргу капливун дагьай.
Чан-чанну тIий, гъили дагьлай,
Ущу-щулгъи щурун бикIай.
Гъи дуркIшиву тIутIал бусай,
Найрду тIутIай ликлан бикIай,
Къув-аьс, цIупар, чявхъагъарал
ЧIун-чIумуй гъинттул чан къашай.
Ссутнил буллугъшиву жунна
Занная ссайгъат-ссаламри.
Дуллумунийн щукру буллай,
КIилахъансса дуланмагъри.
Вана шинал мукьрагу чIун,
Мукьрагу жунна аьркинсса,
Ца дуну, ца дакъахьурча,
Ялапаршин мискин шайсса.
«Дараччи» клубран
Инт дияннин хъя чайсса
Дараччилул кьанкь ххуйри.
Ччаву ххишала хьун дан
«Дараччи» ккулуб ххуйри.
Зияратру цIу бунни,
Мюхтажнан кумаг бунни,
Лакрал хъаннил сий гьаз дан,
Гьайкал дацIан дурунни.
Агь, жул ПартIу ПатIимай,
Та заманнул виричуй,
Бакъассар ялавайсса
Ттизаманнул хъамигу.
Ина тур палцI дуварча
Тай азгъунсса шиннардий,
Вил цIа сийлий ядуллай
Буссар ттисса душругу.
Зул каши абад хьуннав,
Ккуран тIутIайх дичиннав,
ПартIу ПатIимал наслу
Аслийну яхъананнав.
