Май зурул 31-нний МахIачкъалалив Дусшиврул къатлул концертру дай залдануву «Жулва гуж – цашиврувур, жулла аваданшиву –миллатру чIявушиврувур» тIисса цIанилу, республикалул хъаннил форум хьунни, Дагъусттаннал Национал политикалул ва динийсса иширтталсса буллалисса министерствалул ва Дагъусттаннал Хъаннил союзрал сипталийну хIадур дурсса.
[dropcap]Ф[/dropcap]орум цурдагу хас дурну дия ДАССР хIасул дурну 100 шин шаврин. Дагъусттаннал шагьрурдая ва районная бакъагу, Аьрасатнал цаймигу регионная бувкIсса делегациярдугу бия. Масалдаран, Ставрополлая. ЦIубутIуй ккаккан дурна «Дагестан» ГТРК-лул хIадур дурсса, машгьурсса Дагъусттаннал хъанниятусса видеофильм.
Национал политикалул ва динийсса иширтталсса буллалисса министр Энрик Муслимовлул, Дагъусттаннал БакIчинал цIанияту форумрайн бавтIцири барча буллай, кIицI лавгуна Дагъусттаннай экономика, культура, магьирлугъ, элму лябукку буну ва сантирай хьхьичIуннай шавриву хъамитайпалул бияла хъунмасса бушиву, кIулшиву дулаврил, тарбиялул, сайки гьарцагу къайгъурдал хъунмур хъар хъамитайпалул хъачIунттай диркIшиву ва душиву. КIицI лавгуна совет заманнай оьрус учительницахъалгу биялсса захIмат бивхьушиву дагъусттаннал оьрчIан цIакьсса ва куртIсса кIулшивуртту дулунгу, ми гьарца чулуха итххявхсса инсантал хьун бувангу.
Дагъусттаннал хъаннил Союзрал хъунмур Интизар Мамутаевалгу балжийну бувсуна хъаннил Союзрал бивтсса ххуллу-ххуттая, дурсса ва дуллалисса давурттая. Бувсуна Хъун дяъвилул шиннардийгу, Чачаннал аьрщарая Дагъусттаннайн террористътал ххявхсса ппурттувугу, коронавирусрал пандемиялул ппурттувугу республикалул хъами пикригу ца бувну, дакIругу ца дурну, цайнна дурксса кьини чувшиврий лахълай бивкIшиву. Коронавирусрал пандемиялия ихтилат сукку бувнува бусан, хъаннил Союзрал цIаниятусса медаль дуллуна, Дагъусттаннал лахъай азардал хъунмур азарханалул хъунама хIакин РавхIаният Мирзоеван. Та баласса чIун дакIнийн дутлалатисса ихтилатраву, ванил кIицI лавгунни, цуппа каялувшиву дуллалисса азарханалий, сайки 90 процент хъаннил зий бушиву, пасатсса азар къизгъинсса ппурттуву, гьамин, хъаннин багьшиву дурк кьини чувшиврий лахълан, инсантал ххассал буван къахъанай, къумашиврул кIибахIин буллалисса чIун диркIхьурчагу, дард дувансса, пикри бувансса чIуннагу къадиркIшиву.
ВидеолийхчIин хъами барча бувна Аьрасатнал хъаннил союзрал хъунмур Екатерина Лаховал ва кьатIаллил билаятирттаятусса хъаннил ккураннал вакилтуралгу. Национал политикалул ва динийсса иширтталсса буллалисса министерствалул отделданул хъунмур Хасайбат Валиевал дурккуна форумрай гьуртту хьусса хъаннил цIаниятусса резолюция- обращение. Ккаккан дунни хъуннасса концертгу. Аьрасатнал лайкь хьусса артист, Дагъусттаннал халкьуннал артист ТIагьир Курачев каялувшиву дуллалисса «Дагъусттан» ансамбль хIаласса. Вара кьини, форум къуртал шайхту, МахIачкъалаллал хъунмайданнив дия Лачакирттал фестивальгу. Жура-журасса лачакирттавусса, аьнтIикIасса хъаннил чIюлу бувну бувну бия майдан.
Байран лахъа-хъун дурна машгьурсса «Лезгинка» ансамбльданул къавтIалтралгу. БувцIусса залдануву ва МахIачкъалаллал хъунмайданнив халкь чIявушиврул циняв кувннан кув ккаккайсса иш бакъая, лакрал бусравсса душру цаймигу бухьунссия, ттунма хIисав хьуна ДГТУ-лул кафедралул хъунмур, профессор, чичу Жанна Абуева, Дагъусттаннал халкьуннал шаэр Космина Исрапилова, ДГИ-лул преподаватель, философиялул элмурдал доктор Асият Буттаева, 1999 шиналсса дяъвилул ппурттуву Чувшиврул Ордендалун лайкь хьусса Полина Халилова. Ванил цIа личIинура кIицI ларгуна Интизар Мамутаевал цилва докладравугу.
