[dropcap]З[/dropcap]амана анаварну нанишиврущал инсаннал чурххаву чантIа тIун диркIунни чIярусса цIуцIувуртту. Хъинну хьхьичIуннай хьунни техникалул ша ласавугу. Инсаннал чурххаву чантIа тIисса цIуцIавуртту хъин даншиврул, операцияртту бувайни ишла дайсса техникагу, чIяру хьуну дур. Амма, ци техника духьурчагу, инсаннал бакI ххуйну зузийни дакъа, гайгу анжагъсса махрунура личIлай дур.
Каспийск шагьрулул азарханалий зий ур цала даву хъинну ххуйну кIулсса, бакI зузисса хIакин-хирург Мяъсудлул арс Агъаев ХIадис.
ХIадис увну ур Къяннал шяраву 1964-ку шинал. Ванал бутта Мяъсуд ва нину Соня бия учительтал. Мяъсуд ия хIисаврттал учитель.
[dropcap]С[/dropcap]онял оьрус мазрал ва литературалул дарсру дишайва. Ттухьгу Вихьуллал школалий дирхьуссар вайннал дарсру. Мяъсуд, аьпа биву, хъярчийсса лагрулий дарс дишайсса, хIисавртту оьрчIан ччан хьун дайсса учитель икIайва. Мунан ххуйну кIула оьрчIал психология. Цавагу жул классравусса оьрчIал кIива къаласайва. Соняягу на рязиссара: ванил тачIав ттун «кIива» къабивхьуссар.
Диктант чичлай, «кIива» бишинуксса гъалатIру итабавкьуну бунува, шанма бивхьуну бикIайва. Нагу яла хIарачат буллан икIайссияв гъалатI итакъабакьин. Луттирду чIявусса ккалан икIайссияв. Мяйва классгу бувккуну, МахIачкъалалив техникумравун ухлахисса чIумал, чичин багьлай бивкIсса диктантран ттун бия «мукьва» бивхьуну.
Утти зана хьунну хIакин ХIадислучIан. Ванал 1990 шинал къуртал бувну бур Дагъусттаннал мединститут. Мунияр махъ личIи-личIисса Аьрасатнал шагьрурдай специализация дуллай, ваная хьуну ур урологиялул хIакин-хирург. Ва ур лахъсса категориялул хIакин. Аллагьнал ляхъан увсса инсаннал базурду ххуйну къузузийни, кIункIу дуллай дур личIи-личIисса азарду. Духьунссар ми яхъанахъисса кIанттул тIабиаьтрацIун, дукиялуцIун дархIуну хъанахъиссагу. Инсаннал цаллара хасият дур цIуцIаву «кьутI тIун дикIайхту» акъа хIакинначIан къалагайсса.
[dropcap]З[/dropcap]увиллий цара шинал мутталий ХIадислул цимигу къашайшала цIуцIаврил ххяппуща личин увну ур. Вана уттигъанну жул Вихьуллал шяравасса Чаринов Чарингу, ХIусайнов Робертгу бувкIунни ванал хъин бувну. ХIадис хъинну ялув авцIуну даву дуллалисса хIакин ушиврия буслай бия. Вайннал бувсуна ХIадислул хъин буллай бивкIшиву ЦIунтIиннал раондалиясса МахIаммадов Сулайман, Каспийскалиясса МахIаммадов Аьли, МахIарамкантуллал шяравасса 87 шинавун ивсса Букаров АьбдулвахIид. Вайгу хъинну рязину бия тIива ХIадислуя. Му рязишивугу, хIакиннал даву дакъагу, инсан хIисаврай, цалами душ-оьрчIах къадансса ябитавугу дуллай, цала цIуцIаврил къюву арх дансса шикаятрай ивкIшиврия буслай бия тIива. ТIун бикIайхха, хIакиннал буллалисса дарув-дармандацIун, ганал ихтилатралгу 50% бугьлай бушиву цIуллушиву зана дитаншиврул.
[dropcap]Ш[/dropcap]икку мукунма ххи буван ччива ХIадис, Лакку билаятгу дакIния лавгун, шагьрулул инсан хьуну акъашиву. Ванал цала уссурвавращал ядурну дур Къяннал шяравусса буттал къатри. УчIайссар ва кулпатращал гъинттул откускалийгу. Ванащалва бучIайссар уссу-ссурвалгу. Укун шагьрулий яхъанахъиминнал цинявннал, цала шяравусса къатта-къуш лекьан къабивтун, ябавривугу дурхха миллат ххирашиврул, мунил тарих ябуван ччишиврул ччаву.
Гьарца дуллалимуву ччаву дусса зунттал чув ур ХIадисгу. ЦIуллу аннав ина!
