Майрал ахирданий Татарнал хъуншагьрулий Къазаннай хьусса дунияллул халкьуннал дянивсса ментал арифметикалул олимпиадалий ххув хьуну, цалламур категориялий 1-мур кIану бувгьуну, чемпион хьуссия жула лакку оьрчI, Хъурхърал шяраватусса МахIачлул арс Ттупчиев Билал. Ларгмур нюжмардий Чачаннал хъуншагьру Грознайлив хьусса Дунияллул цалчинсса чемпионатраягу Билал зана хьунни чIявусса оьрчIал дяниву 1-мур кIанттун лайкь хьуну. Ва чемпионат Грознайлив хьуссар Чачаннал цалчинма президент АхIмад-хIажи Кьадировлул 70 шин хъанахъисса аьпалул юбилейран хасну.

Билал ур МахIачкъалаллал 10-мур школалул 2-мур классрал дуклаки оьрчI. Ментал арифметикалухун ва машхул хьуну ур ларгмур шинал октябрь зуруй. Хъунма хIал къалавгун, ца зурувату, Билал гьуртту хьуну ур МахIачкъалалив хьусса регионнал дянивсса олимпиадалий, цаламур категориялий 1-мур кIану бувгьуну бур. Гания шийнай унгу-унгуну цала дакIнил лавсъсса гъира магьир буллай, вай махъсса ххувшавурттугу республикалул кьатIув хьусса чемпионатирттай ларсун дур.

Ментал арифметикалух акъасса, Билал машхулну ур мукуна хIала-ккаласса дандибацIавурттал спортрахгу. Уттинин ва гьуртту хьуну ур Москавлив, Тюменнай, Сургутрай ва цайми шагьрурдай хьусса спортрал бяст-ччаллавухгу. ХIасил, Билаллул наградарттал хазна цIанава хъунмасса ва авадансса бур.
Жула чулуха чIиви виричу барча уллай, чIа учин ччай бур Билаллун тIайлабацIу ва оьрмулул ххуллий хъуни-хъунисса ххувшавуртту ва так ххаришивуртту.