Ухссавнил Дагъусттаннайсса районнайнсса аьрххилул лагрулий Дагъусттаннал БакIчинал Врио Сергей Меликовлул Къизлардай чIиллу ва сувенирданул продукция дувайсса предприятияртту ва ттучаннугу ххал бувну, вайннуха зузисса усттартуращал ва каялувчитуращал хьунаавкьунни.

Ва производствалуха зузиминнал республикалул каялувчинахь бувсунни, гьарца шинах вайннал предприятиярттай итадакьайшиву 150-сса миллиондалия лирчусса 140-170 азарда чIила ва сувенирданул хъус. Вай хъус ца жула билаятрай дакъасса, хъинну тIалавну дусса дур билаятрал кьатIувгу. ХIакьинусса кьини халкьуннал художествалул касмурду щурущи дурсса предприятиялул каялувчитал зий бусса бур ттигу ца цIусса цех тIитIинсса мурадрай, мунил строительствалуха. Му буллай бусса бур Къизлардал райондалийсса Ждановка тIисса шяраву. Цала дуллалисса ва дан дакIнийсса давурттая Сергей Меликовлухь хьунабакьаврий бувсуна халкьуннал касмурдал производствалул директор АхIмадов Оьмарилгу.
Заргалтурал цачIанма бувкIсса хъамаллуран ккаккан дуруна дамассрал чаннанния чIиллу дайсса куцгу. ЧIиллу, ххаржант ва турду вайннал дайсса дур жула буттал буттахъал ттуршрахъул шиннардил хьхьичIсса аьдат зия къадурну, карунних.

«Кизляр» тIисса цIанилу итадакьайсса чIиллал хIал бувчIайнан кIулссар ва цIаларгсса брендрал бусрав-сий. Вайннал итадакьлакьисса чIиллу ишлану дуссар авчитурачIагу, балугъчитурачIагу, туристътурачIагу, аьралитурачIа ва спецподразделениярттал пишакартурачIагу. Бусравну дуссар чIиллу коллекционертурал ккураннаву ва дукра-къюссуха зузиминнал дянивугу.
Сергей Меликовлулгу вайннащалсса хьунабакьаврий кIицI лавгуна цува хъинну ххарину ва пахрулий ушиву билаятрал кьатIувгу бусрав хьусса жулла продукциялия.
– Мяйжаннугу ххарира Аьрасатнал цIа лахъа-хъун дансса ва хъуннасса давривух жулла республикагу гьурттуну душиврия. Укунсса предприятияртту лябукку буну зуншиврул хIадурссару жущава бан бюхъайсса кумаг, чIарах бацIаву дуван», – чIурчIав дуруна цала мукъуву республикалул каялувчинал.