«Творчествалул десант» – Хьурттал шяраву
Культуралул министерствалул Халкьуннал ва творчествалул къатлул сипталийну «Творчествалул десант» тIисса проектрал лагрулий жулла республикалул муниципалитетирттай шайссар личIи-личIисса шадлугъру. Хьунни ми уттигъанну Лакрал райондалий Хьурттал шяравугу.
Шадлугърай гьуртту хьунни райондалул творчествалул коллективру: миннувух С. Габиевлул цIанийсса Халкьуннал театр, Хьурттал шяраваллил культуралул къатлучIасса «Хьуридуш» тIисса къавтIаврил ансамбль, таксса балайчитал – АьлихIажи Шамхалов, Мариян Жамалуттинова, Шамсият Какваева ва цаймигу.
Проектрал сиптачитурал агьамми мурадрунугу хъанахъиссар халкьуннал аслийсса культура машгьур даву, халкьуннал творчество хьхьичIуннай даву, оьрчIал творчествалул коллективирдал чIарав бацIаву.
ТIахIунтту даврил мастер-класс
Махъа нанисса ник миллатрал культуралухух, канил пишардахух гьан дуван, никирттал дянивсса дахIаву цIакь дуван, оьрчIавусса творчествалул гьунарду итххяххан буван Республикалул Халкьуннал творчествалул къатлул дуллалисса чIярусса давурттавух кIицI лаган лайкьри чIун-чIумуй личIи-личIисса дуккаврил идарарттай буллалисса халкьуннал канил пишардал мастер-классру. Уттигъанну ва журалул даву хьунни Республикалул реабилитациялул «Надежда» тIисса центрданийгу – цIуллу-сагъшиврул ссуссукьусса 20-нния ливчусса оьрчIругу гьурттусса, бархъаллал тIахIунтту даврилмур мастер-класс. Му бачин бувну бия Халкьуннал творчествалул къатлул пишакар Земфира Мусаева. Мунил оьрчIахь бувсуна му хьхьичIарасса халкьуннал сянатрал аьдатирттая ва ляличIишивурттая. ОьрчIру гъирарай буруглай бия усттарну тIахIни дуллалисса Земфирах, махъ цивппагу ирглий щябикIлай, ххал буллай бия гьунардугу.
Бигьалагай кьинилул шадлугъру
КIулсса куццуй, ванияр кIира нюжмардул хьхьичI дайдирхьуну, жулла республикалул хъун-шагьрулий октябрь зуруйннин гьарца бигьалагай кьинирдай хъанахъиссар «Праздник выходного дня» цIанилусса арт-фестивальданул шадлугъру. Хьунни ми хъун шагьрулул хъун майданнив вай ларгсса бигьалагай кьинирдайгу.
Ва ххуллухми шадлугъирттай гьуртту хьунни Ахттиял, Къайтагъуллал, Ахвахуллал районнаясса творчествалул коллективру ва таксса балайчитал, къавтIаврил ансамбль «Каспий», «Пагьламантал» тIисса циркирал студиялул артистътал. Хьунни Дагъусттаннал художествалул училищалул студентътал гьурттусса пленэр, усттартурал ва цайнува цивппа хьусса художниктурал ярмарка, къайтагъуллал щащаврил, тIама цIуцIаврил ва цаймигу халкьуннал канил пишардал мастер-классру.
Фестиваль дуллалиссар Республикалул Культуралул министерствалул, Республикалул Халкьуннал творчествалул къатлул, Республикалул БакIчинал чIарав ацIаврийну, Республикалул Туризмалул ва халкьуннал канил пишардал, Физкультуралул ва спортрал, Информациялул ва печатьрал министерстварттал ва республикалул муниципал сакиншиндарал гьурттушиврийну.
