«Бяйкьу ххуллийн къабуккан личIлулну бикIияра». Укунсса оьвчаву дуллай ур, террористътуран кумаг буллай ивкIшиврий тахсир ккавккун, цаппара шиннардий дуснакьрай щяикIан кьисмат хьусса Арсен Кьадиров.
Арсен ур ЦIунтIиннал райондалийсса Хамайли шяравасса. Таний ва, 19 шинавусса жагьилсса адамина, цала шяраваллил чIаравсса вацIлуву тIама датIлай ивкIун ур. ВацIлуву хар-хавар бакъа ванан хьунаавкьуну ур ца-кIира шинал хьхьичI «вацIлувун ливхъсса» цала хъинирву. Танал тавакъю бувну бур Арсеннухь ччатI лавсун ухьхьу куну.
Муния тиннай Арсеннул мудан диян дайсса диркIун дур хъинирвучIан дука-хIач1анмур. Ца чIумал ихтиярду дуруччай органнан кIул хьуну бур Арсеннул террористътуращалсса дахIаврия. Ва увгьуну ур. Судрал 5 шин ва 4 зуруй кьянкьасса низамрал колониялий щяитансса танмихI кьувкьуну бур. ЩяивкIун ивкIун ур Татарсттаннай.
Укун захIматсса чIумал ванал дакI данмур буллай бивкIун бур нину-ппу, кулпат ва уссурвал. Арсен дуснакьрайн авкьуну кIива зурува ванан увну ур арс. Бюхъай ва иширалгу ванал дакI гъагъан къариртун дикIан. Колониялий Арсеннул лавхьхьуну бур автослесарьнал пиша.
Ларгсса шинал декабрь зуруй Арсен увккун ур дуснакьрава. Байбивхьуну бур ванал цIусса оьрму. Шяраву давуртту дакъашиврийн бувну, Арсеннул пикри бур МахIачкъалалив увкIун, шикку даврий ацIан. Амма ванахь уттигу тиху-шихунай уккансса ихтияр дакъар. ЯлунчIил, къадагъалул чIун дуккайхту, учIансса пикрилий ур. ЦIана Арсеннун 26 шин дур.
Ва оьвчаву дуллай ур жагьилтурайн, бяйкьу ххуллийн къабагьан личIлулну бикIияра тIий. Арсен кунма, бяйкьу ххуллийх лавгсса ЦIунтIиннал райондалий чансса бакъар. ТерроризмалуцIун бавхIусса иширттал чулуха ЦIунтIиннал район цаппара шиннардий хьхьичIсса кIанттурдай дуссия.
Шяраваллил хъуначу Муса Сиражуттиновлул бусласимунийн бувну, хъинну захIматсса тагьар диркIун дур 2010-2015 шиннардий. ЧIявусса жагьилтал Сириянавун лавгун бур, чIявусса террорданул актру дуллай бивкIун бур. Жагьилтал кьюкьравун кIункIу бан хъуннасса даву дачин дурну бивкIун бур террордануцIун бавхIуми. Халкьуннал ахIвал-хIал ххуйну бакъашиврулгу террористурал дуллалимуницIун кабакьу буллай бивкIун бур. Амма махъсса шиннардий иш чIаланну ххуй хьуну бур. Райондалул администрациялул хъунаманал хъиривчу Оьмар МахIаммадовлул бусласимунийн бувну, тагьар ххуй хьуну дур райондалул администрациялул террорданийн къаршисса комиссиялул ва жагьилтурал политикалул комитетрал дуллалисса хасъсса давурттайну.
