Майрал 17-нний Дагъусттаннал БакIчи Сергей Меликов хьунаавкьунни «Диалог» АНО-лул вакилтуращал.
Ва хъанахъиссар интернет- коммуникациярттал аралувусса Аьрасатнал идарарттал дянивсса компетенциялул центр ва властрал ва жяматрал дянивсса цифралул диалограл оператор. Аьрасатнал Президентнал тапшурлугърайну мукунсса центрду дузал бувну бур циняв регионнай.
Миккун бучIайссар региондалул инсантурал аьрзарду. ЦУР-данувун (Центр управления регионом) дуркIсса ккаккиярттал гьанулий хIадур дайссар тагьарданул хIакъиравусса аналитикалул материаллу, миннуя кумаг шайссар региондалул лябуккулунсса давуртту дачин дуллан.
Сергей Меликовлул тIимунийну, микку зузиминнал хIисавравун ласун аьркинну бур региондалул ляличIишивуртту, микку ялапар хъанахъиминнал хасиятру, багьу-бизу, аьдатру ва субъектрал географиялул тагьар.
«Диалог» АНО-лул директорнал хъиривчу Владимир Табаклул тIимунийну, ЦУР –му хъанахъиссар уртакьтурал проект. Миккусса давурттал жаваблувшивугу аьмссар. ХIакьинусса кьини захIматсса масъала хъанай бур махъуннайсса дахIаву. МуницIунма республикалий чялишсса хIала-гьурттушиву дур социал сетирдаву.Ца чулуха дур ларайсса тIалавшин, гамур чулуха — га бартдигьин щалла къабюхълахъаву.
Табаклул гьартану бувсунни ЦУР-данул давуртту цукун дачин дуван аьркинссарив, инсантурачIан информация цукун биян буллан ва махъуннайсса дахIаву цукун дузал дуллан аьркинссарив.
Хьунабакьаврий махъру лавхъунни «Диалог Регионы»АНО-лул гендиректорнал 1-ма хъиривчу Кирилл Истоминнул ва Аьф-лул Президентнал СКФО-райсса вакилнал кумагчи Сергей Стариковлул.
Хьунабакьаврил ахирданий Сергей Меликовлул бувсунни июльдания махъ ЦУР зий байбишин аьркиншиву информацияртту батIаврил,зана-кьала баврил ва анализ даврил центр хIисаврай, яла тIайла буккан аьркиншиву Республикалул каялувчиначIан хIукму кьамул баншиврул.
