Ххувшаврил кьини щалвагу миллатран ххуйну кIулсса, МахIачкъалалив яхъанахъисса, Хъусращиял шяраватусса фронтовик, машгьурсса музыкант, балайчи, аьрайгу каманчалийн хиянат къавхьусса Саэд ХIусайнаевлул ужагърая хъамал чан къавхьунни.
[dropcap]С[/dropcap]оциал сетирдайгу ва барча уллалисса махъругу, ванал суратругу итталу дия. Дагъусттаннал ХIукуматрал хъунаманал хъиривчуну зий ивкIсса, утти архсса Арктикалий министрнал хъиривчуну зузисса ХIажимахIаммад ХIусайновлуя тIайла хьуну, фронтовикнахь барчаллагьрал махъру учинми чIявуя. «Бюхттулсса инсантал, бюхттулсса билаят!» тIий чивчуну бия ХIусайновлул ванал суратрал лув.
Мяйжаннугу бюхттулсса инсан барча уван бувкIцириннавух бия МахIачкъалаллал шагьрулул мажлисрал Жагьилтурал парламентрал вакилталгу. Вайгу, Шагьрулул жагьилтурал центрданул каялувчи Ися Рамазановгу бувкIун бия, Дагъусттаннал хъунама Сергей Меликовлул маслихIатчи Сагид-Паша Умахановлул тапшур бувну, Саэд ХIусайнаевлун Дагъусттаннал граждан обществалул Жяматийсса советрал чулухасса ларайсса награда – Халкьуннал Виричунал медаль дулун.
«Ватандалухсса ччаврил, чувшиврул яла асар хьунми дарсру дишайминнавух Саэд ХIусайнаевлул цIагу багьавай цIакьну дур. Кьянкьасса адамина ур. Учаймур аьщуй-дазуй авцIуну, дакIний личIанну учайсса хъуначу, насихIатчи ур.
[dropcap]Ф[/dropcap]ронтовик, шадну, ххарину жугу кьамул бувну, усттарну каманча бивщуну жугу тяхъа буллай, зирангну, шавкь дуну ур. ЯлунчIингу жува ванал юбилей барча дуллалисса кьини дучIаннав!» – увкунни Жагьилтурал парламентрал вакил, 1-мур ЦIувкIратусса АхIмад-Хан Муртаевлул. Хъирив кьини АхIмад-Ханнул ттучIан гьан бунни архивраву лявкъусса фронтовикнал Наградной листрал копиягу, ХIусайнаевлул ичIувациринначIан тIайла буккикьай куну.
Нагу тIайла буккав Саэдлул уссил, лакран хъама къаитайсса ва хъамагу къаитантIисса машгьурсса чичул ва фронтовикнал Абачарал душ Качар ХIусайнаевачIан. Ттунмагу барчаллагьрал ххуйсса махъру, зукьлу, дуаь бавунни АхIмад-Ханнул ссалам-ссайгъат сававну.
Барча вил Халкьуннал Виричунал медаль, буттауссу ХIусайнахъал Саэд! Лайкьссара ччянива, хIалал дурссар. ХIажимахIаммад ХIусайновлул хъирив тикрал буван, цIуллушиву дулуннав вихьхьун, Бюхттулсса билаятрал Бюхттулсса инсан!
