МахIачкъалаливсса Ххувшаврил шадлугъирттал дайдихьу хьуна Лениннул Комсомолданул цIанийсса паркравусса саллатIнал гьайкалданучIа ва ЛивтIуминнал аьпалун лархъсса цIарачIа тIутIив дишаврия ва вирттал дакIнийн бичаврия. Шадлугъран лайкьну паркравуцириннан баянну тIий бия аьрали балайрду ва лархъун дия жунна чIявучин бавсса ва кIулсса аьрали макьанну. Аьпалул шадлугъ тIитIлай, ДР-лул БакIчинал Врио Сергей Меликовлул, циняв барчагу бувну, кIицI лавгуна Ххувшаву ласавривусса жула хъунмур никирал бутIа ва дагъусттанлувтурал чувшивуртту.
Барча бавурттая ва аьпалул мукъурттия махъ циняв ца дакьикьалийсса пахъ багьуна. Шадлугърай гьурттуну бия республикалул хIукуматрал циняв каялувчитал, къуллугъчитал, МахIачкъалаллал бакIчи Салман Дадаев, Каспийскаллал флотилиялул хъунама, контр-адмирал Александр Пешков ва цаймигу.
Ца жулла чIирисса республикалия дяъвилийн лавгун ивкIссар 180 азарунния ххишаласса инсан. Миннава Ватандалийн зана къавхьуссар 90 азарунния ливчусса. Дагъусттанная увкссар 59 Совет Союзрал Виричу ваЧувшиврухлусса ордендалул щаллусса 7 кавалер.
ГьайкалдануцI тIутIивгу дирхьуну, аьпалул шадлугърая махъ Сергей Меликовлул ва ванащалсса хIукуматрал вакилтурал тIутIив дирхьуна Вирттаврал аллеялийгу.
Шичча циняв тIутIал шалкращал лавгуна ЯтIул аьралуннал саллатI ва Совет Союзрал Вирттал бувччусса Аьралийтурал хIатталлив. Аьпалул аьдатругу дурну, вирттал дакIнийн бичлачисса махъругу лавхъун махъ, хIурматрал караулданул ярагъуннива салютру итадаркьуна.
Сергей Меликовлул кIицI лавгуна, даркку-дарщусса, гъарал лачIлачIисса кьини дунугу, жунна цинявннан ва яла чаннамур ва дакIнин гъанмур байран хъанахъишиву.
«Бакъахьунссар Дагъусттаннай Хъун дяъвилул щатIив къавщусса кулпат, тухум. Ва мяйжаннугу жула гьарнал хъуннасса ва бюхттулсса байран хъанай дур. ДакIнийхтуну барчаллагьрай буссару жува ва Ххувшаврил байран жунна дуллусса ветерантурахь. Лавгмунил кьимат бакъаний, ялунбучIантIимургу пашманссар бикIайсса. ДакI дарцIуну учинна, дагъусттанлувтурал дяниву мудангу бусравну диркIссар ва дуссар Ххувшаврил кьини. Жула буржри, вирттаврал аьпагу бурувччуну, хIакьину жула дянивусса ветерантурал хIурмат-аякьа дуллан», – увкунни Сергей Меликовлул. Шичча циняв лавгунни Каспийскаллал Хъун майданнив хьунтIисса аьрали парадрай гьуртту хьун.
