[dropcap]М[/dropcap]оскавливгу Дагъусттаннал агьлу зумарду итадакьин цачIун батIаврил аьдат, шиная шинайн тIиссакссагу, цIакь хъанай дур. Апрель зурул 22-нний Москавливсса лак ца урцIух ккуркки лавгун бия. Дагъусттанная хасну вай барча буван бувкIун бия республикалул муфтинал хъиривчу МухIаммад Майранов ва полпред Шамил БахIандаьлиев. Муфтинал цIанияту бавтIцири барча буллай, вайннал кIицI лавгуна укун жямат ца урцIух лагма лаган буллалисса мероприятияртту агьалинал дянив цашиву, нахIушиву дуруччаврицIун кабакьу буллалисса душиву.

Ва кьинисса ихтилатру бия жагьилтуран исламрал кIулшивуртту куртIгу, цIакьгу дуллан аьркиншиврия, динийсса ирс-ххазинагу буруччин, рувхIанийсса ххазинарттачIан кIункIу тIун аьркиншивриясса, маслихIатрайсса, мяърипат дуруччаврил ялув цIакьну бацIан аьркиншивриятусса бия.

Лакрал инициативалун лахъсса кьимат бишлашисса ихтилат бувна бусравсса хъамаличу, политолог, востоковед Руслан Кьурбановлул. РахIму-цIимилул давурттавух чялишну хIала бувхнувасса Разита Мушидован Шамил БахIандаьлиевлул буллуна Барчаллагьрал чагъаргу.

Хъирив кьини, апрель зурул 23-нний, зума ритаврил урцIухун бавтIуна Санкт-Петербургливсса лакгу. Тиккугу Муфтиятрал вакилтурал барча бувна, гъурбатрайгу диндалул ххуллу-ххагу бурувччуну, миллатирттал аьдатругу ядансса хIарачатрай къуццу тIутIисса лак.
ЯлунчIилгу цачIун батIлансса цIуллушиву дулуннав!