Пандемиялия мукьах цалчинсса гастроллу

Лакрал театрданул артистуращал

Ларгсса нюжмаркьини МахIачкъалалив хьунни Къалмукьнал Республикалул Оьруснал драмалул ва комедиялул театрданул гастроллу. ДакIнийн бутан, 2019 шинал «Большие гастроли. Межрегиональная программа» тIисса щалагу Аьрасатнал театрал программалул лагрулий Лакрал театр лавгссия Къалмукьнавун гастроллай. Хъунмасса тIайлабацIу буну ккаккан бувссия Элисталий шанма спектакль: У. Шекспирдул «Гамлет», А. Къапиевлул «Невыплаканные слезы» ва А. Усачевлул «Айболит».
Утти вай бувкIунни жучIанма.

Гастроллал лагрулий «Илчи» кказитрал редакциялий хьунни театрданул вакилтурал пресс-конференция. Муний гьур­тту хьунни театрданул директор, Къалмукьнал республикалул халкьуннал артист Виктор Хаптаханов, Къалмукьнал республикалул лайкь хьусса артистал Санал Церенов, Юлия Клейнер, Наталья Ежкова, Василий Муджиков, Леонид СанхIажиев, театрданул литературалул ва драматургиялул бутIул хъунмур Ирина Горяшкиева. Вайннал гьарза-гьартану бувсунни театрданул тарихрая ва мунил хIакьинусса къайгъурдая.
Виктор Хаптахановлул кIицI лавгунни пандемия сававну биттур къадурну лирчIшиву паччахIлугърал тIалавшиннарду, 65 шинал оьрмулуха ливчусса зузалтран зун къадагъа даву сававну, чан дан багьшиву репертуар.

«Илчилий» хъамалу

Ирина Горяшкиевал бусаврийн бувну, Дагъусттаннайнсса гастроллу хьуну дур пандемиялия мукьах цалчинсса.
Лакрал театрданул Элисталийнсса аьрххи дакIнийн бутлай, Хаптахановлул кIицI лавгунни тай гастроллу хъинну агьамсса ишну хьушиву, так ца цала театрданун бакъассагу, республикалул щалагу магьирлугърал оьр­мулун.

Бадрижат МахIаммадхIажиева Виктор Хаптахановлун
Барчаллагьрал чагъар буллай

– Лакрал театрданул актертурая лахьхьинмур чIявуя. Жу хIайран хьуну ливчIру жагьил­сса актертурал Шекспирдул шеърирду усттарну ва лугъат бакъа ккалаккаврий. Театрал вузру къуртал бувминнащагума къашайссар шеърирду усттарну буккин, – увкунни ванал.
Гастроллай театрданул кка­ккан бунни кIива спектакль. Индиянал магьрал гьанулийсса оьрчIансса спектакль «Принцесса – невидимка», Виктор Хаптахановлул бусаврийн бувну, хъанай бусса бур пандемиялуцIун дархIусса ссуссукьушиннардая мукьах театрданул цалчинсса премьера, му цуппагу хьунни жучIава.
Магьа ккаккан бувкIун бия МахIачкъала шагьрулул 36-мур школалул ва чIяру профи­ллу дусса лицейрал дуклаки оьрчIру.

Испаннал драматург Алехандро Касоннул «Утренняя фея» бишин хьхьичI Лакрал театрданул каялувчи Бадрижат МахIаммадхIажиевал театрданул директорнан буллунни Дагъусттаннал магьирлугърал министр Зарема Буттаевал чулухасса Барчаллагьрал чагъар ва Расул ХIамзатовлул шеърирдал жуж. Таналгу буллунни мукунмасса Барчаллагьрал чагъар ва Къалмукьнал лайкь хьусса художник Сергей Ользятиевлул къулбасращалсса сурат.

Театрдал каялувчитурал кIицI лавгунни, кувнная кув архну бухьурчагу, театрду ялапар хъанай бушиву рувхIанийшиврул ва магьирлугърал цасса майданнив, мунийн бувну коллективрду кувннащал кув уртакьну зий байбишаврийну театрдал дянивсса магьирлугърал дахIавуртту цIакь хъанай дайдишинтIишиву.
«Утренняя фея» бур хьхьи­чIа­васса испаннал бусала, цивугу ккаккан бувну бур ца кулпатрал кьадар: ца кулпатравусса ччаву, ххаришиву, къюву, хаиншиву, умуд. Ссигъарисса ишир­ттал айххихху итлай ур тамашачи спектакль байбивхьуну къуртал хьунцIа.


2021 шинал январь зурул 12-нний Къалмукьнал Оьруснал драмалул ва комедиялул театрданул кIицI ларгун дур 30 шинал юбилей.
Театр хIасул хьуну бур 1937 шинал тIивтIуну бивкIсса Б.Ба­санговлул цIанийсса Къалмукьнал паччахIлугърал театрданул оьруснал труппалия.
Театрданул коллективраву хIакьинусса кьини зий ур 61 инсан, чIявуми бур театр хIасул хьуния шинмай зузисса.
Щалагу Аьрасатнал ва дунияллул лагрулийсса театрал фестиваллай гьарца шинал гьурттушинна дуллай ва хьхьичIунсса кIанттурду бугьлай, театрданул труппа хьхьичIунсса ххуттай бур.
2000 шинал мюзикл «Про Федота-стрельца» хьуну бур Йошкар-Олалийсса Дунияллул халкьуннал дянивсса оьрус театрдал фестивальданул яла агьам­сса ишну. 2001 шинал Вологдалий «Голоса истории» тIисса фестивальданий театр лайкь хьуну бур шанма дипломран: язимур режиссуралухлу, адаминал ва хъамитайпалул язими роллахлу.
Къалмукьнал халкьуннал артист, Аьрасатнал лайкь хьусса артист Александр Щеглов 2013 шинал Тамбов шагьрулий хьусса Н.Х. Рыбаковлул цIанийсса VII регионнал дянивсса театрал фестивальданий лайкь хьуну ур «Актер России» цIанин.
Вара фестивальданий Къалмукьнал халкьуннал артистка Елена Хаптаханова лайкь хьуну бур жюрилул чулухасса хасъсса премиялун «За служение русскому театру».
Гьашину театр гьуртту хьун тIий бур «23 дня до Победы» тIисса Щалагу Аьрасатнал театрал фестивальданий.
ХIакьинусса кьини театрданул репертуардануву бур 30-нния ливчусса спектакллу – классика ва ттизаманнул драматургия.
Ссуттил дакIний бур бишин шанма хъунмасса премьера – «Гроза» (Н. Островский), «Сон в летнюю ночь» (У. Шекспир) ва «Миллионерша» (Б. Шоу).

Читайте также: