Гьашину «Единая Россия» партиялул дайдихьлай дур кандидатътурахлу чIурду буллалисса избирательный компаниярттал даву. Аьрасатнал ПаччахIлугърал Думалувун ва ДР-лул Халкьуннал Мажлисравунсса бувчIавуртту хьунтIиссар сентябрь зурул 19-нний. Кандидатътал бувчIлачIисса компаниярттал даву най дикIантIиссар май зурул 24-30-ннийн бияннин электрон журалий «Госуслуга» порталданийхчIин. Дагъусттаннай сияхIрайн лавсунни «Единая Россия» партиялул чулуха АьФ-лул ПаччахIлугърал Думалувунсса ва ДР-лул Халкьуннал Мажлисравунсса депутатътал. Вайннавух ЦIуссалакрал райондалул чулуха ДР-лул Халкьуннал Мажлисра- вунсса кандидатътурал сияхIрай ур Хавчаев Муслим МахIаммадович.

Муслим Хавчаев увну ур 1971 шинал август зурул 15-нний МахIачкъалалив.
1992-1996 шиннардий зий ивкIун ур 9-мур, 10-мур, 14-мур, 17-мур ва 21-мур профтехучилищалул жагьилтурал, студентътурал активраву балугъравун бияннин­сса жагьилтурал тIулдакъашивуртту дан къаритаву мурадрайсса давуртту дачин дуллай ва пишардал техникалул кIулшивуртту лахьхьин дуллай.
2016 шинал увххун ур Да­гъусттаннал паччахIлугърал педагогикалул университетрал Педагогтурал кIулшивуртту ласай­сса факультетрайн. 2019 шинал къуртал бувну бур хьхьичIунсса хIасиллащал.

2020 шинал дуклан увххун ур «Общая педагогика и история педагогического образования» тIисса пишкаршиврул аспирантуралувун. Ва аралуву Муслим Хавчаевлул сакин дурну дур цува авторсса программартту, монографияртту ва цаймигу макьалартту.
2002 шиная шинай Муслим дачин дурну ур педагогикалул ххишаласса кIулшивуртту дулаврил даву. АрхIала ва ур цува аторсса методикалийн бувну, цIуллу-сагъшиврул ссуссукьушиву дусса оьрчIащал реабилитациялул ва вардиш баврил давуртту дачин дурну.

Муслим Хавчаев лайкь хьуну ур Ухссавнил Осетиянал Культуралул министерствалул чулухасса «ХIурматрал грамоталун», «Аьрасатнал, Дагъусттаннал халкьуннал промыслирдал мастер, художник» хIисаврай лайкь хьуну ур лавайсса категориялун. Ванал хIадур бувсса учениктал цимилгу хьуну бур республикалул, щалагу Аьрасатнал конкурсирттал лауреатътал ва призертал, цимилгу ларсун дур ванал каялувшиннаралусса оьрчIал коллективирдал Дунияллул халкьуннал фестивальлал «Гран-при».
2014 шинал цала даврил хьхьичI бивхьусса масъалартту усттарну биттур баврихлу Муслим Хавчаев лайкь хьуну ур «АьФ-лул аьмсса кIулшивуртту дулаврил хIурмат бусса зузала» тIисса ларайсса цIанин. Муслим Хавчаев ур «ЗахIматрал ветеран», ванал бур хъунмасса опыт насихIатрал даву дачин давриву.
2006-2008 шиннардий зий уссия республикалул оьрчIан ва жагьилтуран граждан ва патриот тарбия дулаврил центрдануву.
2008 шинал ивтуну ур ва центрданул заведующийну.

2009 шинал увххун ур МахIач­къалаллал шагьрулул администрациялул Жагьилтурал иширттал ва туризмалул, спортрал комитерал муниципал къуллугърал консультантну.
Пандемиялул ппурттуву «Лакрал жагьилтурал суккушиннарал», «Вирттал» ва «Вместе сможем» тIисса ихIсандалул фондрал волонтертуращал зий ивкIун ур азарханардайн, шаннагу лакрал районналул агьалинан ва ахIвал-хIал кIюласса кулпатирттан дукиялул наборду диян дуллай.

Вай давурттаву хьхьичIунсса гьурттушинна дарихлу лайкь хьуну ур Дагъусттаннал БакIчинал чулухасса «Барчаллагьрал чагъарданун».
Муслим Хавчаевлул Дагъусттаннал Мажлисрал депутат хьуншиврулсса агьаммур савав дур агьалинал оьрмулул ахIвал-хIал лавай баврицIун, щинал масъалартту, ххуллурду низамрайн буцаврицIун, транспортрал масъала дузал баврицIун ва социал-экономика хьхьичIуннай даврицIун бавхIусса.

Цува увчIуну, цайнна вихшала дарча пикрилий ур агьалинал, райондалул, ЦIуссаминалийн агьали бизан баврил управлениялул каялувчитурал кумаграцIух ва «Единая Россия» партиялул чулуха Федерал цIакусса программарттавух чялишсса гьурттушинна даврийну райондалийн инвестицияртту кIункIу дуллансса давуртту чялиш дуккан дуллан.
Му бакъассагу, ванал программалувасса агьаммур масъала бур ЦIуссалакрал райондалий кIанттул инвестициярттал программартту иширайну зузи дуллансса, культуралул, ЖКХ-лул, щинал щаллу баврил, оьрчIал ва спортрал площадкарттал объектру цIу дуккан дуллансса.

– Агана нава дептатну ув­чIирчан хIарачат банна ттула кIулшивурттугу, опытгу, гужгу ишла бувну, райондалул экономикалул даража гьаз бансса, агьалинал оьрмулул шартIру бигьа дансса давуртту дан, – тIий ур Муслим Хавчаев.