Буттал КIанттул цIанийсса Хъун дяъвилия ятIа-тIар бакъа зана къавхьуминнавасса ца ур ттул ттаттал, Хъун МахIаммадал, уссу Кубачанов ХIабибуллагь МахIаммадлул арс. Ватандалийн кьини дурксса чIумал ХIабибуллагь, мюрщисса арс ва душгу кулпатрачIа кьабивтун, Хъусращиял шярава цалчинсса кьюкьравух аьрайн лавгун ивкIун ур. Жул ттаттал цалва бачин бувну ивкIсса оьрмулул дневникравасса чичрурдайн бувну, Хъусращиял шярава дяъвилийн лавгминнава зана къавхьуну ур 159 инсан.
Шинну ларгнугу, Кубачановхъал кулпатран уттигу хъама ритан дурар дяъвилул дурсса куртIсса щаву, луглайнма, кIул буллайнма бур ХIабибуллагьлул бакIрачIан бувкIмур.
Кубачанов ХIабибуллагь увну ур 1917 шинал. Хъусращиял шяраву ва ивкIун ур цалчин комсомол билет лавсъсса жагьил. 1930 шинал Хъусрахь комсомол ячейка сакин дурсса чIумал, ХIабибуллагь ивтун ивкIун ур секретарьну. Ва цувагу гьарица ишираву итххявхсса, хъинну бакIралгу ххуйсса, ябацIансса, сий дусса жагьил ивкIун ур. ДакIний бур, ванал аьпалуя дурагу лирчIсса ца сурат дуну, ттаттал му цала дуснайхчIин Москавлив хъунна дан гьан дурну диркIсса. ХIакьину ва макьалалий рирщусса суратгу ХIабибуллагьлул дяъвилийн гьаннинсса документирттай рирщуну диркIсса, 1947 шинал Москавлия хъунна дурну дуркIсса суратри.
Кубачановлул аьрали ххуллу бур 1942 шинал 10-мур ОСБР-нуву ва 1943 шинал 29-мур битултрал дивизиялуву.
Гьуртту хьуну ур Туапсе душмантурая буручлачисса ва Краснодардайн гьужум буллалисса операциярттаву, Краснодар мурахас буллалисса талатавурттаву.
1943 шинал август-сентябрь зурдардий Полтавский областьрайсса Псел нех лахълай хьусса оьсса талатавриву ХIабибуллагь гьуртту хъанай ивкIсса 29-мур битултрал дивизиялул лагма рургьуну, душманнал гуж цимилгу ялтту бувккун, чIявусса жулва аьралуннал жанну дуллуну диркIун дур.
1943 шинал август-сентябрьданий 29-мур дивизиялуву Воронежуллал фронтрайсса 47-мур армиялуву гьуртту хьуну ур Украина мурахас баврийнсса хIадуршиннарду дуллалисса талатавурттаву. Псковский областьрай, Псел неххай хьусса оьсса талатавурттаву вайннал дивизиялул цаппара частьру дирирну дур душмантурахьхьун.
Вай цимурца исват хъанай бур «Воинский адрес по последнему письму» тIисса Ккуллал райондалул РВК-лул 07.07.1947 шинал №0221-мур Хъун дяъвилия зана къавхьуминнал сияхIрал управлениялул хъунаманал учетрай чивчумунийн бувнугу.
ХIабибуллагь Кубачанов ва частьраву ушиву тасттикь буллай бур цамургу документрал – Ккуллал райондалул РКВ-лул ятIа-тIар бакъа зана къавхьуминнал сияхIраву чивчусса «Адрес и дата по последнему письму от военнослужащего» тIисса документрай. Шикку чивчуну бур 1943 шинал 10 ОСБР 29-мур битултрал дивизиялуву талайсса чIумал ХIабибуллагьлуя махъва-махъсса чагъар бувкIшиву.
1943 шинал «Аьралитурал цIарду чирчусса сияхIраву» ХIабибуллагь талай ивкIсса чIун, Псел неххай оьсса талатавуртту най диркIсса чIун ва ми талатавурттаву вайннал дивизиялул лагма душмантурал рургьуну, чIявусса аьрал ливтIусса чIун цалийн тIайла дацIлай дур. Ва информация лявкъунни жун 29-мур битултрал дивизиялул « Память народа» т1иссааьрали журналданул сайтрайгу.
Бюхъай му ппурттуву 26.08.1943 — 06.09.1943 шинал Кубачанов ХIабибуллагь ивкIуну, ягу ясирну агьну икIан.
Вания гихунмайгу, пикрилий буру Бюхттулсса Ххувшаву гъан дуллай ивкIсса аьраличунал бакрачIан бувкIмунил хъирив лаян, му увччусса аьрщарайн биян ва мунал аьпа абад бан.
