Буттал кIанттул цIанийсса Хъунмасса дяъвилий Ххувшаву ларсун 76 шин шаврицIун бавхIуну гьашинугу щалагу жула билаятрай най дуссия аьдатравун дагьсса оьрчIал творчествалул конкурс «Ттул Хъун дяъвилул Виричу» («Мой герой большой войны») тIисса.

Гьашину конкурсраву гьуртту хьуну бур хьхьичIсса шаннагу шинал цачIунунияр ххишаласса оьрчIру – 19175 инсан.
«Сурат» номинациялуву гьуртту хьуну, конкурсрал сертификат лайкь дунни жула АхIмад АхIмадовлул душнил, 14 шинавусса Марижатлул.

---

Ванил дирхьусса суратрай ур Ватан дуручлай жан дуллу­сса ттатта, Хъювхъиял шяравасса АхIмад ва ванал нину Мардижа. Дяъви байбишиннин ттатта учительну зий ивкIун ур. Цалчин­сса гьантрайва дяъвилийн лавгун, 1942 шинал ивкIуну ур.

­Аьрая ниттичIан гьан бувсса чагъарданий ва чичлай ур:
«На кьимат къабивщуна лирчI­сса ттул аьзизсса нину, ина пахрулий дикIу на увну, хъуна увну, Ватан дуруччин дяъвилийн гьан увну тIий. Ватан вийн барчаллагьрай дикIантIиссар…».
Суратрай мукунма бур билаятрал хъун шагьру Москав, Ххувшаврил ттугъ, мизит Ая София – Турциянал шагьрулий Стамбуллайсса бусурманнал ва ххачпараснал аьмсса рувхIанийсса кюру.

– Конкурсрай гьуртту хьун гьуз учин бувнав жу махъ ппур­ттуву Буттал кIанттул цIанийсса Хъунмасса дяъвилия ва бюх­ттулсса Ххувшаврия баллалисса тIааьн бакъасса хавардал. Махъсса шиннардий Турциянаву ва цаппарасса Аьрасатнал ва СНГ-лул билаятирттал жяматраву баллай бур ай, та оьруснал дяъвир бивкIсса, бусурман та дяъвилий гьуртту хьун къааьркинссия т1исса. СССР-нул чулий талай бивкIсса бусурманнал рухIру дужагьравур дусса тIисса, тIааьн бакъа­сса хаварду.

Кьурандалий чивчуну буссар Ватандалухлу жан дуллуми шагьидталли тIий. Ватан дуручлай жан дуллусса жула виртталгу алжаннавур бусса. Жул ттаттан Ватанну Совет Союзри диркIсса. Дяъви байбивхьусса чIумал таналгу, та кунмасса СССР-нийсса миллион бусурмантуралгу, душманная Ватан дуручлай, къучагъшиврий жанну дуллуссар. Миннал рухIру алжаннавур дусса.
Ххирасса гьалмахтал, ватанлувтал!

Бюхттулсса Ххувшаву – му жула тарихрал, лавг оьрмулул яргсса, цIанихсса лажинни. КъабацIанну му чапал дан, къабитанну жула лавгмур баххана бан. Мудангу бусланну жула оьрчIахь, оьрчIал оьрчIахь, ялун нанисса никирахь жула къучагъсса бава-ттаттахъая. Жува вирттаврал наслуру, – тIий, оьвчаву дуллай ур цала кулпатращал Турциянал билаятрай ялапар хъанахъисса АхIмад АхIмадов.

Р.S. ХIурмат бусса АхIмад! Вин хъунмасса барчаллагь, Ватандалия архну унугу, буттал кIанттухсса ччавугу, мякьгу хьхьара хьун къаацIлай тIий. Барчаллагь Ватандалул тарих буруччаву, Аьрасатналгу, Турцияналгу билаятирттал дянив дакьаврийсса арарду дуруччаву мурадрай бихьлахьисса захIматрахлу. Ина кунмасса ватанлувтал чан къабаннав жула дянив.