Цимирагу шинал хьхьичIра дайдирхьусса ва шиная шинайн цIакь хъанахъисса аьдатрайн бувну, МахIачкъалаливсса ва чIаххуврайсса шагьрурдайсса лакрал Ххувшаврил байран дайдишай МахIачкъалаливсса АхIмад-Хан Султаннул гьайкалданучIа тIутIив дишаврийну. Гьар шинах кунма, ва базилухгу чIявусса агьлу бавтIун бия гьайкалданучIан.

Цалчинмур ЦIувкIуллал Жяматийсса советрал председатель, профессор ХIусайханов МахIаммадбаглул агьали барча буллалисса ихтилатраву кIицI лавгуна хьхьичIра ва кьини хъун дуван тамансса ветеранталгу батIайсса бивкIшиву, цаягу фронтовик-ц1увк1рачу сагъну ливч1ун акъахьувкун, батIавугу цал архIал ххарисса ва кьурчIисса байран хъанай душиву.

Агьали барча буллалисса ихтилатру бувна профессор, академик АьвдурахIман Халиловлул, АхIмад-Хан Султаннул маччачу Сайдун Х1ажикьурбановлул. Ххуйсса гьурттушинна дурна Лаура Бакриевал каялувшиву дуллалисса чIава «аметхановцынал» кьюкьлувусса оьрчIалгу. «Буттал к1анттул ц1анийсса Хъун дяъвилийн Дагъусттанная 180 азарунния ливчусса инсантал лавгун бур. Ххувшаву ларсния шихуннай циксса шинну гьарчагу, щалвагу Аьрасатнал агьалинан ванияр чаннасса, цал архIал ххарисса ва пашмансса байран цамур дакъар, жува бусраврай ва пахрулий дакIнийн бичару жула вирттал, Ххувшаврихлу жанну дуллуминнал аьпа учару, ппухъруннал чувшиврия пахрулий жулва наслугу тарбия буллан аьркинссару.

ХIакьину Виричунал гьайкалданучIан ч1явусса мюрщи оьрч1ругу бувккун бия, вагу жува жула ялун нанисса ник т1айласса ххуллу-ххуттай тарбия дуллай бушиврул лишанни»,– увкунни Мурта Муртаевлул.