Ххувшаврил кьини Дагъусттаннал хъунама Сергей Меликов фронтовиктурачIан МахIаммад Шагь-ХIусайновлучIан ва Кьурбан КьурбановлучIан шавай ивунни вай барча буван.
Меликовлул барчаллагь увкунни ветерантурахь Ххувшавриву бутIа бишаврихлу ва дяъви къуртал хьуну мукьахгу, зий-захIмат буллай, узданну оьрму бутаврихлу. МахIаммад Шагь-ХIусайнов хъунама сержантнал чиндалуву дяъвилул цIаравух увккун ур, дяъвилия мукьах, аьрали-политикалул армиягу къуртал бувну, зий ивкIун ур комсомолданул ва партиялул къуллугъирттай, тамансса шиннардий каялувшиву дурну дур Аьрали къуллугърал ва дяъвилул ветерантурал республикалул комитетрай.
Ванал Меликовлухь бувсунни цанма хъинну кьурчIи бизлай бушиву хIакьину Хъун дяъвилул Ххувшавриву СССР-данул биялалул кьимат ялавай буван кьасттирайсса, тарих баччан буллалисса ихтилатру. «Ва совет халкьуннал Ххувшавур. Мукьра шинал мутталий дяъвилул цIараву ливчIссар 27 миллион совет инсантурал, американал КIилчинмур дяъвилул ппурттуву 405 азара инсан ливтIуссар, ингилисналгу миннаяргу чансса.
Ххувшавриву биялсса бутIа бивхьуссар захIматрал фронтрай, фабрик-заводирттай, колхоз-совхозирттай зий бивкIминнал ва совет агьалинал аьмсса ххувшавур»,– увкунни ветераннал аьрали альбомру, архиврду ххилтIу буллай МахIаммадлул. Кьурбан Кьурбановма дяъви байбишайту, 15 шинал оьрмулуву, НКВД-лул истребительтурал батальондалуву ивкIун ур, къинттуллухсса душмантурал, ясустурал, дезертиртурал хъирив агьну. Дяъви къуртал хьуну мукьах паччахIлугърал мюхчаншиву дуруччай органнай зий ивкIун ур. Республикалул хъунаманал кIиягу ветераннан бахшишругу дуллунни.
