Дагъусттаннал паччахIлугърал университетраву ххи хьунни цIусса къуллугъ — цифровой трансформациялул проректор.
Му къуллугърай ивтунни жула лаккучу МахIаммадов Бадруттин Аьлиллул арс, хьхьичIунну ДГУ къуртал бувну, цифровой аралий зузаврил биялсса опыт бусса.
– Цифровой аралувусса кIулшиву – му хIакьинусса кьинилул тIалавшиннар. «Цифрардал» ялун бучIантIимур хъунмасса бур, мунил хьхьичIунсса пишакартурал тIурча, му бучIантIимур жучIанма гъан бантIиссар. ДакI дарцIуну ура Бадруттин МахIаммадовлул ДГУ-рал цифровой ара цIусса даражалийн дуцинтIишиврий. ЧIа тIий ура ванан цIусса къуллугърай тIайлабацIу! – увкунни ДГУ-лул ректор Муртазааьли Рабадановлул.
2006 шиная 2009 шинайн ияннин Бадруттин МахIаммадов зий уссия Москавлив MSSQL-данул администраторну, технический директорну, отделданул каялувчину.
2010-2018 шиннардий – МахIачкъала шагьрулул администрациялул информационный технологиярттал управлениялул каялувчину.
ДГУ-лул проректорнал къуллугърай итаннин зий уссия ДР-лул информатизациялул, связьрал ва массовый коммуникациярттал министрнал цалчинма хъиривчуну.
