Хъун дяъвилул майданнай талай бивкIсса ва жанну дуллусса жула буттал бутта­хъан лайкьну аьралуннаву къуллугъ буллалисса хIакьинугу чан­сса бакъассар жула Дагъусттаннал арсурваврал дянив.

Мукунминнавасса цаннан ккалли ан бучIиссар Петропавловск-Камчатскийлийсса, утти­гъанну Ххувшаврин хасну хьу­сса аьра­ли парадрал главнокомандующийну итан лайкь хьу­сса лаккучу, полковник, Северо-Востокрайсса аьрали гужирдал командующийнал хъиривчу, Султаннул арс АхIмадов Сухрабгу. Ва утти кIилчинмур парад­ри Сухраблул каялувшиврий хъанахъисса. Ларгмур шиналгу Владивостокрай Ххувшаву ларсун 75 шинан хасъсса юбилейрал парадгу хьуссия ванал каялувшиврий.

Увну ур Сухраб 1974 шинал Грознайлив КIихIарчIиял шяраватусса АхIмадов Султаннул ва Ппалассуннал шяраватусса Анисатлул кулпатраву. Къуллугъ кьабивтсса полковник Султан цала кулпатращал цIана яхъа­най ур МахIачкъалалив.
Циняв аьралитурал кулпатру кунма, вайнналссагу личIи-личIисса шагьрурдайн тIайла буккайсса бивкIун бур. Мунияту, Грознайливсса школалия тIайла хьуну, Сухраблул дуккавугу хьуну дур Майкопрайгу, Москавливгу, Томскалий ва Новосибирскалийгу. Школа къуртал бувну махъ дуклангу увххун ур Новосибирскаллал аьрали училищалувун. Дуккаву къуртал дурну махъ тIурча, байбивхьуну бур жагьилнал мяйжаннугусса аьра­личунал оьрму. Къуллугъ буллай ивкIун ур билаятрал личIи-личIисса аьралуннал гужирдаву – танкардал, флотрал, разведкалул ва цаймигу. Къуллугъ буллан тIайла увккун ивкIун ур Ссибирнавунгу, Забайкальскалийнгу, Дагъусттаннайн ва Чачаннавунгу. Аьрасатнал аьралуннан къабигьасса чIунну диркIун дур тай. ДиркIнугу, чув, ци къуллугърай ивкIнугу, Сухраб, цайва бивхьусса буржру дакI марцIну биттур буллай, шиная шинайн лахъ-лахъсса чиннайн лахълай, цIана полковникнал чиндалийн лавхъун ур. Вай махъсса шинну ванал хьуну дур Тихоокеаннал флотрайсса аьралуннаву къуллугърай. ЦIана тIурча, Сухраб ур Северо-Востокрайсса аьрали округрай.
Аьрали училищалуву дуклакисса чIумала Сухраб язи увгьуну ивкIун ур хъуниминнал 1995 шинал Москавлив, ЯтIул майданнив, Ххувшаву ларсун 60 шин хъанахъисса юбилейрал парадрай гьуртту хьун. Гания мукьах ЯтIул майданнив хьу­сса цимирагу парадрайгу мукуна гьуртту хьуну ур. Вайксса шиннардий билаятрал аьрали гужирдавух чялишсса гьурттушинна дуллалисса Сухраб лайкь хьуну ур личIи-личIисса наградарттан ва барчаллагьрал чагъардан. Дур миннувух ХIукуматрал наградагу – Чувшиврул орден.
Аьралитурал оьрмурдая гьарта-гьарзану буслан къа­бучIисса къадагъагу духьувкун, буслай буру так ванал цала бувсмур. Вай гьант­рай нитти-буттачIан хъамалу МахIачкъалалив увкIсса Сухраб­лул цала бусаврийну, ванал каялувшиврий чансса къабикIайсса бур жула Дагъусттанная аьрали къуллугъ бан бувцусса жагьилталгу. Миннавух чансса къабикIайсса бур хъинну тарбиягу бувсса, духIин-дуциннарал, багьу-бизулул чулуха лази-лавкьусса ва ччимур ишираву яхI-къирият дусса жагьилтал. Хьунабакьайсса бур дагъусттанлувтурал цIа зия дан хIарачат буллалиссагу. Мукунминнащалгу тарбиялул ихтилат­ру буллай, Сухраблул хъуннасса гьурттушинна дувайсса дур тарбиялулми давурттавухгу.
Гьар шинах, Аьрасатнал сайки циняв аьрали гужругу гьурттусса, «Армейские войны», «Суворовский натиск», «Танковый биатлон» ва цаймигу аьралитурал дянив бусравсса бяст-ччаллавух гьуртту хьусса ванал каялувшиврийсса экипажирттал бугьайсса бур хьхьичIунсса кIанттурду. Цаппара шиннардил хьхьич1 личIи-личIисса хIукуматирттаясса аьра­ли гужирдал экипажру гьуртту хъанахъисса турнирданий Аьрасатнал команда лайкьну кка­ккан дурсса, Сухраблул каялувшиврий хIадур увсса, жулла республикалиясса яру оьрчI МахIаммадов Маратлул, цаннил хъирив ца, 3 шинай 1-мур кIану бувгьуну бивкIссар. ЦIана ва, аьрали къуллугърай хIаписарну уну, капитаннал чиндалийн ккаккан увну усса ур. Сухраблул арсгу, ттаттая ва буттая эбрат ларсун, цIана дуклай усса ур аьра­ли училищалуву. Арс акъа­сса, Сухраблул бур ялагу 2 душ.
Ванал цала бусаврийну, нитти-буттал шяраваллавун, КIихIарчIав ва Ппаласмавгу, ва ивну ур мадара шиннардил хьхьичI, мудана куна, цакуну Ватандалийн гьан мутта биривсса чIумал.
Аьрали оьрму язи бувгьу­сса Сухраблун гьарца ишираву тIайлабацIугу чIа тIий, ялун­ссаннунгу чIа учинну хъунна­сса чиндалийн лавхъун, мунищал барча уллалисса чIунгу. Сухраб кунмасса жагьилтурал лахъа-хъун буллайнма личIаннав мудангу жула вирттаврал минасса Дагъусттан!