[dropcap]О[/dropcap]ьрмулул шачIанттай дакIнил лавсъсса пиша язи бугьлагьисса чIун дикIайхьунссар яла агьаммур. ТIабиаьтрал тIурча, инсаннан буллуну бикIай пагьму, гьунар. Миннул кIункIугу айхьунссар цалва хияллал хьунийн. Школалий дуклай унува сахIналийн уккансса хияллай ивкIун ур Лакрал театрданул жагьилсса артист МахIаммад Агъаров.
Увну ур МахIаммад Лакрал райондалий КIундиннал шяраву, Рустамлул ва Хамисатлул кулпатраву. Ванал ппугу бюхханну балай учайсса, жяматрал хъатIай-хъиншивурттай тяхъашиву дувайсса музыкант ур. Ванаяту ирсирай бивхьунссар МахIаммадлуйнгу балай учаврил пагьму.
Совет заманнай, интернетгу, телефоннугу цирив къакIулсса чIумал, хъуннасса ххаришивуну шайва щархъавун Лакрал театрданул зузалт бучIаву. Клубраву щябикIансса кIантту бакъасса чIунну дикIайва.
Мукун бувкIсса гьарцагу спектакльданийн гъирарай лагайсса ивкIун ур чIавасса МахIаммадгу, шавай зана шайссагу ивкIун ур рязину, цавува цува щугълурдай. Ванан асар шайсса бивкIун бур артистътурал тIуркIу, хъярчийсса ихтилатру, миннал дургьусса личIи-личIисса рольлу. Школалий унийва балайрду тIий, художествалул самодеятельностьрал иширттавух чялишну гьуртту хъанахъисса МахIаммадлул пикригу бувну бур гихунмаймур оьрму музыкалуцIун ва театрдануцIун бахIин.
Театрданул даву тIайланна дархIуну дур балайрдацIун ва къавтIавурттацIун. МахIаммадлул щаллу байсса балайрду бур уттизаманнулссагу, нукIузаманнулссагу.
[dropcap]Ш[/dropcap]колалия махъ увххун ур Б. Мурадовал цIанийсса Дагъусттаннал Культуралул ва искусствалул колледжравун. Миву дуллалисса мероприятиярттай гьуртту хъанай, гъирарай къуццу тIисса жагьил культуралул зузалтрал итталун агьну ур. Оьвкуну бур ванайн Лакрал миллатрал театрдануву зун. Зийгу унува, ларайсса кIулшиву ласунсса пикрилий, дуклан увххун ур ДГУ-лул культуралул факультетрайн.
МахIаммад кIибачIлай ур театрданувун хьхьичIа-хьхьичI увкIсса чIумалсса цалва асарду:
бахшишращал
– Залданува сахIналийн буруглагийни, тамашачитуран ккаккай оьрчIи-кIурисса, магьлуву куннасса, личIиссара дуниял. Нагу му караматсса дунияллийн хъит тIун икIайссияв. Амма артистнал пиша – му бигьа бакъасса пиша бур. Артистътурал хъунмасса захIмат бишайссар гьарцагу спектакльданийн хIадур хъанай, тамашачитуран чIумул буниялагусса тагьар ккаккан дан, цахьхьунна дуллусса образравун уххан, ганиха лавхьхьуну къуццу буван, – тIий ур МахIаммад.
Ванал уттинин театрдануву дургьуну дур цикссагу роллу. Гьарца цайнна тапшур дурсса образ багьайсса куццуй ккаккан дан хIарачатрай ур. Масалдаран, «Хъин хъамаличу» тIисса къямадиялуву ва ур полициялул зузалану. БучIир учин, ва увнувасса полициялул зузала ур куну.
Театрданувусса атмосфера тIурча, бур личIиссава, му бавхIуну бур миллатрал культуралуцIун. Мунихь, та бухьурчагу, хъунмасса бияла бур миллатрал рувхIанийсса оьрму ябавриву. Мунияту театрданул артист цува ушивугу, тарихрал ххуттай цалла цIа душивугу ца бахттилун ккалли буллай ур МахIаммад.
Театрданул даву тIайланна дархIуну дур балайрдацIун ва къавтIавурттацIун. МахIаммадлул щаллу байсса балайрду бур уттизаманнулссагу, нукIузаманнулссагу. Ва гьуртту шай, лакрал бакъассагу, Дагъусттаннал машгьурсса артистурал концертирттай, хъатIай, хъиншивурттай. Уттигъанну хьусса «Отчет года– 2021» тIисса Дагъусттаннал балайчитурал концертрай МахIаммадлул балай лайкь хьунни хасъсса бахшишран.
Оьвхъусса, чаннасса асардал дакI видурцIусса артистнан чIа тIий буру ванияр тихуннайгу ларайсса бахшишру ласлансса гъира ва шавкь, дуллалисса давриву хьхьичIуннайшивуртту, оьрмулуву тIайлабацIуртту.
Г. Саидова
