Буттал кIанттул цIанийсса Хъунмасса дяъвилий жула халкьуннал дурсса виричушивугу хъанай дур тарихрал чIапIину. Ми тарихрал чIапIаву ца агьамсса кIану бугьлай ур лакрал бюхттулсса арс, Совет Союзрал Виричу Якьув Сулаймановлул.
Майрал 15-нний Якьув Сулайманов ниттил увну 100 шин хьуссар.
Хъун дяъвилул хьхьичI шиннардийва Якьувлул къучагъшивруяту чичлан бивкIун бур аьрали кказитирттай. ХIатта И. В. Сталиннулгума ванан барчаллагь баян буллалисса чагъар бувкIун бур. 1941-ку шинал дуллуну дур Якьувлун «За отвагу и мужество» тIисса медаль, 1942-ку шинал «Орден Славы», 1943-ку шиналгу кIилчинмур «Орден Славы».
1945 шинал апрель зурул 22-нний Берлиннайн ххуллу ласласисса талатавриву ваначIан дуркIун дур телеграмма: «Старшему сержанту Сулайманову Якову Магомедовичу. От всей души сердечно поздравляю Вас с высшей наградой страны – с присвоением Вам звания Героя Советского Союза! Желаю Вам здоровья и новых боевых успехов в борьбе за свободу и независимость нашей Родины!»
Маршал Василевский.
Дяъви байбишайсса кьини Якьув усса 646-мур полк бивкIун бур баргълагавал чулухсса Украиннай. ХьхьичIва-хьхьичI вайннан багьну бур жиндралсса душманнан ххуллу кьукьлан. Кьирийхгу, ссавнийхгу гьарзад щях дихьлахьисса душманнал гужирдащал лаянсса ярагъ вайнначIа къабивкIун бур. Аьрал бикIу, халкь бикIу аьрщи-ссав хIала дурхсса талатавурттаву кьатI хъанан бивкIун бур.
Якьувлуйнгу гужсса щаву дирну, медсанбатрайн иян увну ур гьалмахтурал. Аьрал махъунмай най, вайннащал медсанбатгу най бивкIун бур. Бинтирдай авхIусса Якьув цайна цува увкIукун, хъит тIун ивкIун ур изан, амма кару-ччанну, тIаннуйн дурккун, сукку дан къабюхълай диркIун дур. КIива барз ххишалагу госпитальданийгу бувну, зана ивкIун ур Якьув цала полкравун. Ва ххуллух Якьувлуйн тапшур дурну дур 18 разведчик усса кьюкьа, аглан къавхьуну цаятува арх бакъа бавцIусса душманнал аьралуннал гуж-ккал кIул дан аьркиншивугу баян бувну бур. Хьхьуниву Якьувлул, увцуну цащала ххюя цайми разведчикгу, кьаст дурну дур душманнал чулуха цанма аьркинмур цIуххинсса «маз» угьан. «Маз» учайсса бивкIун бур цIухху-бусу бан увгьусса душманнайн. Ванал пикри бивкIун бур хьхьувай къаралданий бавцIуминнаяту цу-унугу угьан. Ххярклий, чIу-чIитI къахьунсса куццуй душманнал лагерьданучIан гъан шавайсса чIумал, ванан хIисав хьуну дур цаятура ца ацIва шаттирал манзилданий дурксса кьакьа, тиччагу лагьсса гъалгъардал чIурду бавну бур. Якьувлул команда дуллуну дур цала гьалмахтурайн, хавар бакъа, цIиникьру кунма, гайннал ялун ххяххияра, куну. Мукун ххявххун, Якьувлул цалагу кьатI увну ур ряха фашист, цагу ясир увну ур. Тиккусса пулеметгу, ярагъругу лавсун зана бивкIун бур полкравун.
1941-ку шинал, ноябрь зуруй, Якьувлун «За отвагу и мужество» тIисса медаль дуллусса чIумал, 646-мур полкрал командир майор Тарасов чичлай ур аьрали кказитрай «… старший Якьув Сулайманов бакIчисса разведчиктурал отрядрал эбрат ласунсса чувшивуртту дуллай бур. Вай гьантрай ва кьюкьлувасса ацIния цая лавгссия душманнал дургьусса шяравун, тайннал ярагъуннил лагру кIул дан. Вайннал щинчIав хавар къахьунсса куццуй кIул бувну душманнал цIу дишин хIадурсса пулеметру бивхьусса къатрал чIавахьултту, цакуну тай чIавахьулттайн гранатарду дирчуну, ххявххун бур шяравун. Гьанавиххи хьуну, цIаннаву чуннив къакIулну битлатисса душмантураяту 17 фашист ясир увну, миннацIун шанма пулеметгу, минометгу лавсун бувкIунни…»
Дяъвилул ххуллурдай аьралуннал хьхьичI ххуллу тIитIлай нанисса Якьув Сулайманов бакIчисса разведчиктурал кьюкьлул циняв махIаттал бансса къучагъшивуртту ккаккан дуллан бивкIун бур. Цимилгу кIусса щавурду дирну Якьув агьну ур госпитальданийн, ччаннай ацIайхту зана шайсса ивкIун ур цала полкравун. 1944-ку шинал душманнал никъурай бизлай, къинттуллухун щилай, жула аьрщарая буккан бувну нанисса чIумал, Якьувлун чIярусса медаллугу, кIира «Орден Славыгу» дуллуну диркIун дур . Цалчин геройнал цIа дулун ккаккан увну ур Якьув 1944 шинал, май зуруй. Украиннай душманнащал талатисса чIумал, неххал тиячулий душмантал бавцIуну, шиячулий Якьувлул полк бавцIуну, тайннал неххайхсса ламурду пIякь учин бувну буну, нех лахъан ламу бан бавчукун, тия тайннал цIу дихьлай, зун къабитлай бивкIун, командирнал увкуну бур Якьувлухь, цаппара вила разведчикталгу бувцуну, хьхьуниву нех лахъияра, яла тайннал къинттуллухун, вацIлувун, бувккун махъа битлай тай хъяврин бувара, куну. Мяйя разведчикгу увцуну, лавгун ур Якьув неххал тиячулийн, вацIлувун бувххун, буруглан бивкIукун, ккавккун бур вацIлуву ца кьанив тайннал ясир бувсса чIявусса жула аьрал, вайннал лагмарагу мяйра танк дарцIуну. Жула разведчиктурал цал чIиллах къарал кьатI бувну, гайннал ярагъгу лавсун, кьаст лархIуну дур ца-цаннал ца-ца танкрайн гранатарду дирчуну, тай ччуччин, му чIумал ясир бувсса жуламиннахьхьун ярагъ буллуну, тай цивппагу ххассал бан. Цакуну, архIал циняр танкру ччучлан диркIувкун, танкистал, тIанкIа тIий, лихълан бивкIун бур. Гайгу ясир бувну, гайнначIасса ярагъгу зевххуну, жула ясир тархъан бувну бур. Му чIумал неххал шиячулийсса Якьувлул полкрал ламугу бувну бивкIун бур. 9 разведчикнал 200 жуламигу ясирданула ххассал бувну, кьунияхъайсса немецналмигу ясир бувну бувкIукун, хъуннасса махIатталшиву дурну дур командованиялул, Якьувгу Геройнал цIа дулун ккаккан увну ур. 1945-ку шинал, январь зуруй, Пруссиянаву Мазуриннер каналданучIа Норенбург шагьру ласласисса талатавриву Якьувлул кьюкьлул ряхва душманнал аьралуннал бувцIусса кьай духхай машинардугу пIякь учин бувну, 320 инсангу ясир увну бувкIукун, командованиялул кIилчингу ккаккан увну ур Якьув Геройнал цIа дулун. Апрель зуруй маршал Василевскийл телеграмма дуркIувкун, циняв бивкIун бур ва махъра-махъ дурсса къучагъшиврухлу дуллусса ххай Якьувлун Геройнал цIа. Иширах бургарчан, 1944 шинал дурсса представлениялийну дуллуну диркIун дур. ХIатта командование диркIун дур Якьувлун кIилчинмур цIуку бучIантIиссар тIий.
1946-ку шинал аьрая зана хьусса Якьув Лакрал райкомрал тIайла увккун ур лаваймур партшколалийн дуклан. Га къуртал бувукун, тIайла увккун ур Каспийск шагьрулул Горкомрал инструкторну. Амма кабинетраву щяивкIсса даву къаххирасса Якьув лавгун ур Донбассрайн цала аьрали гьалмахтурацIун шахтарду буллалисса даврий зун. Тикку хъунмасса хIаллай кIулну къабивкIун бур хъуниминнан цачIава Совет Союзрал Герой зий ушиву. 20 шин дурну дур Якьувлул тийх, яла цала оьрчIру бацIай хьувкун, тайгу тийхва къаличIаншиврул, зана ивкIун ур Дагъусттаннайн. Донбассрай ва лайкь хьуну ур «Шахтерской Славы» ордендалун, «Лениннул» ва «Октябрь революциялул» орденнан.
Якьув увкIун МахIачкъалалив, лавгун ур МахIаммад ХIажиевлул цIанийсса заводрайн слесарь-наладчикну зун. Гиккугу къабувсун бур цува Герой ушиву. Яла махъ Украинная Герой Якьувлух луглай букканнин.
Лахъисса чIуннардий буттал аьрщарая архну ивкIнугу, ттун къаккавкссар Якьув куна цала буттал шяравалугу, Лакку кIанугу ххирасса, буттахъал тарих кIулсса, аьдатру кIулсса ва марцIну лакку мазрай гъалгъа тIисса цамагу.
Миясат Щурпаева
2006 ш.
