Мукьра къурушрансса «Ххувшаву»

Аьдатравун багьну бур, апрель зурул ахирдания байбивхьуну, Ххувшаврил кьинилул хьунийн Георгийл цIанийсса лентарду бачIлачIаву ва хъазамрай лачIлачIаву. Ва хъанан дикIай Хъун дяъвилий Ххувшаву ларсъсса кьинилул ца лишанну.

Уттигъанну, апрель зурул ахирданий, МахIачкъалалив лавгун унува, на КIилчинмур рынокрал даралувусса ца луттирдал ттучандалувун увхссияв. Уххайхтува, луттирдах ургансса мажал къабивтун, ттучанчи душнил: «Ттун перерыврай гьан багьлай бурча, анавар укку», – куна. Нагу, туну, лу ласунсса мажал къабивтукун, гиккува луттирдал ялув бивхьусса Георгийл лентардавасса ца лавсун, кьатIув увкссияв.

Ттун гай уква­сса ххива. Уква бикIайхха гьарца кIанай бачIлай. Амма, га цIана ттул хъирив бувккун, ттучанчи душнил: «Ленталул багьа мукьра къурушри», – куна. Нагу ххюра къуруш дуллуссия. Тту­хьхьун сдачигу къадуллуну, душ кIичIиравусса инсантуравух хIала бувххун лавгуна.

Ттул дакIнил макьугу, га цIана «ччех диркIун», яларай дагьуна. Шинай цал хьунадакьайсса, чIявусса инсантурал жанну жухлура кьурван дурсса Ххувшаврил лишан арцух дахлахавугу, гьич, къатIайласса ишну чIалай бия.

Цукун бухьурчагу, на га лента, цамур ттучандалия къуппан-ххалаххигу лавсун, хъазамрайн лавчIссия.
Барча цинявннаннагу цасса Ххувшаву ласаврил кьини!