Гьашину май зурул 3-нний ттул хъунама уссин, Буйдалавл арс ХIажиев Аьбидинан хьунтIиссия 85 шин. Аьпалухьхьун лавгсса чIумал ванан дуссия дурагу 63 шин, барткъабивгьунма ливчIссия ванал дакIнийсса чIявусса мурадру.
Увссар Аьбиди 1936-кусса шинал ЧукIуннал шяраву, хъудугьултрал кулпатраву. Шяравугу, райондалийгу Буйдалавхъал тухумрал цIа мудан машгьурну диркIссар захIмат бангу хьхьичIунсса, тIул-тIабиаьтралгу уздансса, дуккаврихунгу машхул хьусса агьлу хIисаврай. Хасну Буйдалавхъал тухумрая бивзссар илданий цалчинсса учительтал, хIакинтал, аьлимтал. Жул буттал ттатта Буйдалавл арс ХIусайн 15 шинал мутталий ивкIссар шяраваллил хъуначуну; буттауссу Аьбдул-Муъмин ХIажинал арс ивкIссар ДР-лул халкьуннал кIулшиву ласаврил отличникну, зий ивкIссар школарттал директорну Лакрал, Ккуллал ва ЦIахъардал районнай; буттарссу Написат ДР-лул лайкь хьусса хIакинни, зий бивкIссар республикалул медициналул аралуву ккалли бансса личIи-личIисса къуллугъирттай. Жула тухумрал хъуними инсантал уссингу, ттунгу мудан эбратну бикIайва.
Школа бувккуну махъ, 1953-ку шинал, Аьбиди увхссия Дагъусттаннал пединститутрал филологиялул факультетрайн. Му къуртал бувну мукьахсса захIматрал ххуллугу байбивхьуссия Гимриллал дянивмур даражалул школалия. Хъирив зий уссия Щаржавуллал (Гергебиль) школалий ва райОНО-рай.
1967-ку шинал Аьбиди, хъинну зат кIулсса специалист хIисаврай, увцуна зун Дагъусттаннал учительтурал кIулшиву ларай дайсса институтравун. 1970-ку шинал ванайн оьвкуна зун ДАССР-нул Министртурал советрал аппаратравун, гикку ванал бартбигьлай ивкIссар хъунама консультантнал, оргинструкторнал, председательнал кумагчинал къуллугъру. 1988-ку шинал Аьбиди увцуссар ДАССР-нул Верховный Советрал президиумравун, зий ивкIссар микку Верховный Советрал аппаратрал иширттал каялувчину.
Даврилми иширттай акъассагу, Аьбиди оьвхъусса ва личIлулну аякьалийсса ия ичIувагу, цала агьлу-авладрал дянивгу. Ва мудангу учIину лякъайссия щала жяматрангу.
Жул нину Аьйшат, хIакьсса зунттал хъамитайпа, сайки бусса оьрмулий зий, захIмат буллай диркIссар колхозрал давурттай. Мунил хъунигу бувссару жу, шама арс, тай дяъвилул ва дяъвилия мукьахсса хъинну жапасса шиннардий.
Жул бутта Буйдалав хушрай цува аьрайн лавгун ивкIссар. Биялсса талатавурттал ххуллурдугу бивтун, жандалуцIа хьуссар Днепр нех лахълахъисса чIумал, 1944-кусса шинал.
Ттула аьзизсса уссил, лакрал миллатрал лайкьсса арснал, чIалачIин, образ, ванал уздансса багьу-бизулул лишанну, оьрмулул дарсру яхъанай личIантIиссар Буйдалавхъал тухумрал ирсирал лахъишиврий.
Ина дакIния къауккайсса вил уссу, Буйдалавхъал Арсен,
ш. Москав
