Ххаллилсса, тяхъасса Хъурдаккаврил байран хьунни вай гьантрай Хъюллал шяравугу. Ва дуллай ия цала оьрмулул чIяруми шинну шяраваллил хозяйствалул давурттай гьан дур­сса, махъсса шиннардий Хъюллал школалий учительну зузисса, жяматрачIагу хIурматрайсса Куртулав МахIаммадов. Ванал чIарав бацIан личIи-личIисса шагьрурдая бувкIун бия ванал оьрчIру, гъан-маччами. Хъарас щаврил байран дан хьхьичI кьини Хъюлив хьунни цамургу кIицI лаган бучIисса даву. ЦIуссалакрал ЦIуминалийсса имам, Куртулавл арс ХIасаннул сипталий, шяраву дунни мавлид. Ва дунни Лакрал ва Ккуллал районнал имамнал, Бархъаллал, Хъюллал ва Хъюлибигьуллал имамтурал сакиншиндарай. Вагу хъирив кьини хьунтIисса Хъарас щаврил байрандалул хъин-дайдихьу хьунни.
Гьунттий кIюрххил ссят 9-10 хьусса чIумал жямат бавтIунни Хъузалал тIивтIусса авадансса ссупралухун.

Бисмиллагь бувну махъ, аьдатрайн бувну, дургьумур дюхъаншиврул, бакIлахъия авадансса хьуншиврул, хъарас щун увккун нанисса хъузалал ялтту руртIунни щин, гьургу дунни нахIу-нацIу дархIусса мурхьирал къяртта. Яла хъузала хьхьичIну, дуаьрттугу дуллай, щарнил жямат бувккунни къурув хъарас щун. ХъюллачIа дия ттунна цайми щархъаву къаккарксса цамургу аьдат. Хъузалал хъарас щилащисса чIумал, хъами був­ккун, хъунил мукьвагу мурцIний хъунтIри дурккун, бивчунни ини, ччатI-нисирал парчри, ялун дукьрахIангу руртIуну, бахьлаган бунни аьрщараву, лухччинул чIан дуцIиннав, чIаллул бакI дуцIиннав, Заннал цIими бишиннав, баргъ-гъарагъи дакьиннав тIий, дуаьрдугу дуллай. Хъузалал хъарас щайхту, байрандалийн бувкцириннал, мюрщи-хъуни къаувкуну, цаннайх цаннал кьяркьи дугълай, хIаз лавсунни. Хъирив байбивхьунни спортрал бяст-ччал. Левчуну ххув хьуминнан дуллунни ссихьрал къалипру бувну дур­сса бартри. Вай ласун хIарачат буллан бикIайссар щар къадурцусса, дуцин нанисса жагьилтал. Вайннал бахшиш дайссар цала ларсъсса бартри буцай душваран.
Хъурдаккаврил байран ларгунни тяхъану, цинявппагу рязину.