Дагъусттаннай гьарица кьини Госавтоинспекциялул дуллай бур ДТП-тту къашаву ва ххуллул низамрава бувксса ишру ялун личин баву мурадрайсса мероприятияртту. Ялув бацIаву дуллай бур машинарттал пюрунт цIан бувну къазанан.

Закондалул тIалавшиндарайн бувну, машиналул хьхьичIсса пюрунт 70% чанну чани буллалисса бикIан къабучIиссар. Амма чIявуми шупIиртурал, ва тIалавшиндарах къулагъас къадурну, хъинну цIан буллай бур пюрунт, мунийну цалагу, цайминналгу оьрмулун ва цIуллу-сагъшиврун нигьачIисса тагьар хIасул дуллай. Ва тIалавшинна къадуруччаврихлу 500 къурушрал аьчIа дишайссар (ч.3.1 ст.12.5. КоАП).

Агана шупIир га цIана пюрундалийсса пленка букьан рязи хъанай акъахьурча, мунал хIакъираву низам дуруччаву тIалав дуллалисса чагъар щаллу байссар.
Агана шупIирнал ялагу тIа­лавшинна щаллу къадарча, му жавабрайн уцинтIиссар хьхьичI­мунияр кьянкьасса статьялийн бувну (полициялул зузалал тIалавшинна щаллу къадаву). Му чIумал 500-нния 1000-ннийн дияннинсса аьчIа дишайссар ягу 15 гьантлийсса дуснакь айссар (ч.1 ст.19.3 КоАП).

ЦIансса пюрунт бивхьусса машинарттая хъуннасса нигьачIаву дуссар шупIиртуран ххуллу ххуйну чIалай бакъашиврийн бувну. Хаснура хъуннасса нигьачIаву дуссар цIансса чIумал.
Госавтоинспекциялул зузалт оьвчаву дуллай бур рульданух щябивкIсса цинявппагу инсантурайн, цала машинартту мюхчаншиврул тIалавшиннардан лав­хьхьусса тагьарданийн буцияра тIий. Ца инсаннал баччибакъашиврул чIявусса инсантурал бакIрачIан бала буцин бюхъайссар.