Апрельданул 7-нний хьунни Щаллагу дунияллий к1иц1 лагайсса ЦIуллушиврул кьинилун хас дурсса пресс-конференция. Муний ххал бивгьунни республикалий ГТО-лул нормативру дулаврил ва агьали цIуллусса оьрмулул ххуллийх бачин баврил масъалартту.
Журналистътуращал хьунабавкьунни «Трезвая Россия» тIисса федерал проектрал координатор, ВФСК ГТО-рал ДР-лийсса вакил Шамил Аьлиев ва ВФСК ГТО-рал республикалул центрданул хъунама судья Арслан Хасаев.
Миннал тIимунийну, ВФСК ГТО сакин бувну бур 2014 шинал, мунил мяънагу, мурадгу хъанай бур агьали цIуллусса оьрмулул ххуллийх бачин баву.
– Жул пикрилий, агьали ГТО-лул нормативру дулаврийн кIункIу баврил хъуннасса мяъна дуссар, цанчирча мунийну цIакь хъанахъиссар инсаннал цIуллушиву, – кунни Шамил Аьлиевлул.
Арслан Хасаевлул бувсунни хъуннасса къулагъас дуллай бушиву республикалий физкультуралух ва спортрах. Мунал тIимунийну, цIанасса ппурттуву дуллай бусса бур чIярусса спартакиадартту ва универсиадартту, миннувух гьуртту хъанай бусса бур азарахъул инсантал, дуклаки оьрчIругу, оьрмулул бугьарамигу. Ми иширттавух чялишну гьуртту хъанай бусса бур районнал ва шяраваллал жяматругу, хIакьину сайки гьарца райондалий бусса бур ВФСК ГТО-лул вакилтал. СССР-данул заманалийнияр цIана ГТО-лул нормативру дулун бигьа хьуну бур.
Цамургу ца агьамсса зат: ГТО-лул лишан ларсманан булайсса бур бонусру, ми хIисавравун ласайсса бур ЕГЭ-лул баллу булайсса чIумалгу.
