Апрельданул 6-нний хьусса коронавирусрал инфекциялийн къаршисса Оперштабрал батIаврий Дагъусттаннал БакIчи Сергей Меликовлул тапшур бунни цIакь дуллан Дагъусттаннал чIаххувсса регионнащалсса арарду.

«На ххари хьура Дагъусттаннал жямат анавар къабувккун къуццу тIий бикIаврия жулла республикалийсса ца райондалий хьусса ишираву. Амма жува цинявннал аьркинссар тIайласса хIасиллу дуван мунил хIакъираву ва къабучIиссар къулагъас къадурну бикIангу, ягу гихунмайгу питнарду буллансса багьанану хьун битангу. Му иширал чIалачIи буллалиссар национал политикалуву диялдакъашивуртту хьуну душиву. Ттул пикрилий, дакъар жучIара ттигу аьмсса, СКФО-рал цаймигу регионнащал хIала-гьурттусса дуккаврилгу, культуралулгу, национал политикалулгу, жагьилтурал политикалулгу аьркинссаксса проектру. Ми давуртту хIурхIа ларгун дур пандемия ва цаймигу ишру сававну. ХIакьину аьркинни ми масъаларттаха зий байбишин. Мунийн бувну на жаваблувсса министерстварттахь ва ведомстварттахь тавакъю буллай ура, хьхьичIун ласун Чачаннал Республикалущал ва Ухссавнил Ккавкказуллал цаймигу республикарттащал рязишиврийсса, дусшиврул арарду цIакь дуллалисса, промышленностьрал, шяраваллил хозяйствалул , спортрал, жагьилтурал политикалул арардавусса ва цаймигу цачIусса проектру.