Итникьини, апрель зурул 5-нний, «ХIакьикьат» кказитрал редакциялий хьунни Дагъусттаннал аьрали комиссар Дайтбаг Мустапаевлущалсса пресс-конференция. Шикку гьуртту хьунни Дагъусттаннал информациялул ва печатьрал министр УмархIусман ХIажиев, «ХIакьикьат» кказитрал хъунама редактор Оьмахан Оьма­ханов. Аьрали комиссарнал, апрель зурул 1-нния дайдирхьу­сса интнил призыврал хIакъираву бувчIин бавурттугу дурну, ларгсса шинал ссуттилсса призыврал хIасиллу дунни.

Апрель зурул 1-нния байбивхьуну, июнь зурул 15-ннийн бияннин, Аьрасатнал цайми субъектирттай кунна, Дагъус­ттаннайгу дайдирхьуссар инттусса призыв. Интту Дагъусттанная аьралуннаву къуллугъ бан гьантIиссар 3 азаруннийн бив­сса жагьилтал.
— 2020-ку шинал пандемиялул тагьарданий жуща бювхъунни республикалул сайки циняв шагьрурдая ва районная 8 азаруннийн бивсса жагьилтал аьралуннавун гьан бан. Миннава 3,5 азара инсан — ссуттилсса призыврай. Аьра­луннаву къуллугъ бан бувцусса инсантурал 70% бия ларайсса ягу дянивсса хасъсса кIулшивуртту ларсъсса. 70% бия ДОСААФ-рал дуккаврил идарарттай аьрали касму (С,Д,Е категориялул щупIиртал, крановщиктал, фельдшертал) ларсъсса. Ларгсса шинал призыв нанисса чIумал хIисавравун ларсъссар щалагу билаятрай­сса пандемиялуцIун дархIусса тагьар. Республикалул сборный пунктрайн увкIсса гьарицагу призывникнал дурссар тестирование. Му дурссар призывниктурал хъирив бувкIсса аьрали къуллугъчитуралгу. Ко­ронавируcрал инфекция кIул даву мурадрай кIира нюжмардий цал тестру дуллай бивкIссар аьрали коми­ссариатирттал зузалт, мукунма батIай пунктрайсса давурттавух хIаласса къуллугъчитал. Укун ялув бацIаврийн бувну, 2020-ку шинал ссуттил призыврал чIумал ялун ливчуссар коронавирусрал инфекция дусса 20 призывник, мукуна къашавайминнащал хIала-гьурттуну ивкIсса 100 призывник. Цинярдагу Аьрасатнал субъектирттая аьралуннаву къуллугъ буллан бувкIми цив­ппа- цивппа къуллугъ буллантIисса кIанттурдай кIира нюжмардий карантиндалий бивкIссар. Вайра мюхчаншиврул давуртту 1- мур апрельдания байбивхьуну цIанасса призыврайгу дантIиссар. Цинявппагу аьрали комиссариатирттал зузалтрал дурссар вакцинация. Апрель зурул 10- ннийн бияннин вакцинация дантIиссар призыврал комиссиялул члентурал ва хIакинтурал. Дагъусттаннал БакIчинан кIанайсса Сергей Меликовлул хIукмулийну, апрель зурул 1-нния байбивхьуну республикалий сакин бувну буссар 52 муниципал ва 1 республикалул призыврал комиссияртту. Гьарица аьркинмунил (маскардал, катIрал, бахиллал, кварцрал лампардал, термометрардал ва м.ц.) аьрали комиссариатру ва призыврал комиссияртту дузалну буссар, – бувсунни цала ихтилатраву военкомнал.
Ванал тIимунийн бувну, ларгсса шинал контрактрай къуллугъ бан Дагъусттанная гьан увну ур 1,5 азарунния ливчусса инсан. Аьра­ли комиссарнал бувсунни махъсса шиннардийсса аьра­луннавусса цIушиндараягу: утти ларайсса ягу дянивсса хасъсса кIулшивуртту ларсминнаща бюхъайссар, призыврай къалавгна къуллугъ бан, контрактрай гьан.
Ларгсса шинал аьралуннаву къуллугъ бан тIайла буккаву мурадрай аьрали касму 1000-нния ливчусса инсантурал ласун бувну бивкIхьурча, гьашину 2000-ннал ларсун дур.
Ларгсса шинал 1000-нния ливчусса выпускниктал личIи бувну бивкIун бур Обороналул министерствалул дуккаврил заведениярттавун буххан, миннава 350 инсан увххун ур.
– Цукун къуллугъ буллай бур дагъусттанлувтал, тIул­дакъа­шивуртту дурсса кIан­ттурдугу шай­рив? – тIисса Умар­хIусман ХIа­жиевлул суалданухьхьун жаваб дуллай, военкомнал бувсунни цIанасса чIумал 20-сса инсаннал хIакъираву силистта най бушиву, амма хьхьичIсса шиннардих бурувгун, мукунсса ишру чIаланну чан хьушиву. Ларгсса шинал аьра­ли частирдал командиртурал 40 -нния ливчусса жула ватанлувтурал хIакъираву цIарду дурсса кIанттурду хьушиву.