Шарип Шарипов, ДР-лул шяраваллил хозяйствалул ва бакIлахъиялул министрнал 1-ма хъиривчу, экономикалул элмурдал доктор:
ЦIанасса Рисала диялну дахханасса дур хьхьичIминнуяр, ванил хъунмур мурад бавхIуну бур социал аралуцIун, хъунмур къулагъас инсантурахасса дур, миннал мюхтажшиндарахсса ва къайгъурдахсса дур.
Жунма исватну чIалай бур Аьрасатнал Президент аьрасатлувтурал ялун бучIанмунил, гьунттийсса кьинилул пикрирдай ушиву. Президент ур дахьва дунияллийн бувкминнал, цамур чулуха ка-кумаг бакъаминнал, чIарав ацIанма акъаминнал пикрирдай. Му хъинну агьамсса затри, хаснува жагьилсса, ташулул ххуллийн буккан хIадур хъанахъисса никиран.
Рисалалуву Президентнал чIурчIав дурунни социал масъалартту дузал буллансса ният душиву экономикалул лябуккулийну. ДуллантIий бур цIусса предприятияртту, дузал буллантIий бур цIу-цIусса зузи кIанттурду, лавайсса харжругу бусса.
Жунма чIалай бур паччахIлугърал кьаст душиву инфраструктуралул масъаларттаха чялишну зунсса, хIаллихшиннарду ххисса кредитру итадакьлай. Му агьамсса сигналли бизнесран. МуницIунма паччахIлугърал ният дур дукьан дуллан цинярда бюрократ дайшишру, бизнесрайнсса кьюч бигьлагьавуртту.
Рисалалуву Владимир Путиннул хъуннасса къулагъас дурну дур регионну лядуккан даврих, экономикалул каширду цIакь даврих, махъун дагьлагьими регионнан кумаг баврих. ХIакьину федерал центрданул буругаву укунсса дур: кьуват бусса регионну — му цIакьсса Аьрасатри. Ттул пикрилий, шикку кIицI бувсса агьамми масъалартту хъанахъиссар жула билаят хьхьичIунмай кIункIу тIаврил гьануну.
