Аьрасатнал Президентнал Рисалалул хIакъиравусса пикрирду

Сулайман Маммаев, Да­гъусттаннал паччахIлугърал медициналул университетрал ректор:
АьФ-лул Президент Владимир Путиннул цала Рисалалуву кьимат бивщунни коронавирусрал инфекциялущалсса талатавриву медициналул вузру къуртал бувминнал, ординатортурал ва студентътурал дурсса давурттан.
Жула республикалул азарханардал «ятIулмур» ва «щюллимур» зонардай зий бивкIссар 500-нная ливчусса хIакинтал ва 112 ординатор Дагъусттаннал медициналул катастрофарттал центрданул, Минздраврал, Роспотребнадзорданул колл-центрдаву. ДГМУ-лул чIявусса волонтертал гьуртту хьуссар «Жува цачIу буссару» тIисса проект бартдигьавриву, миннал агьалинан бувссар маслихIатрайнусса кумаг. ХIакьинусса кьинигу миннал дачин дурну дур мура даву. Вузрал каялувчитурал миннацIун кабакьу буллай буссар.
Жул сипталийну сакин бувну бивкIссар дуклакиминнан кумагрансса 20 млн къурушрал фонд. Арцу дарчIуну диркIссар коронавирусрал инфекциялущал талатисса студентътурайх ва ординатортурайх. Жу пахрулий буру захIматсса чIумал оьсса азарданущал талай бивкIсса жулва студентътурая ва ординатортурая. На вихну ура миннаяту хIакьсса хIакинтал хьуншиврийнгу. Владимир Путиннул чIурчIав дурунни бювхъуссаксса чIявусса аьрасатлувтурал ковидрайн къаршисса прививкартту дан аьркиншиврий, инфекция ппив шаврил хьхьичIалу цамур куццуй кьукьин къабюхъантIишиврий, коллективнайсса иммунитет хьун дан аьркиншиврий.
Дагъусттаннал Минздравращал цачIуну тIитIарду вакцинациялул пункт жула университетрал администрациялул къатраву. Жул циняв студентътурал ва зузалтрал му кIанай бувссар вакцинартту.

Читайте также: