Апрель зурул 1-нний Каспийск шагьрулий С. Орджоникидзел цIанийсса Машиностроениялул ва сервисрал колледжраву хьунни WorldSkills Russia-2021 Жагьилсса пишакартурал региондалул VI-мур чемпионатрай гьуртту хьуну хьхьичIунсса кIанттурду бувгьусса студентътал барча буллалисса шадлугърал даражалийсса мажлис.
Гьурттучитал ва хъамал барча буллалисса ихтилатраву колледжрал директор МахIаммадрасул Муслимовлул кIицI лавгунни вай чемпионатирттал кумаграйну студентътуран пишардал усттаршиву ва кIулшивуртту ккаккан дансса, кувннацIа кувннал даврил опыт лахьхьинсса сант ххишала хьушиву. Ванал мукунма барчаллагь увкунни Дагъусттаннай WorldSkills чемпионатирттал даву дачин дурминнахь, хаснува жагьилсса пишакартурал дянив захIматрал пишарду машгьур баву мурадрай буллалисса захIматрахлу ДР-лул захIматрал ва социал хьхьичIунмай шаврил министр Изумруд МухIуттиновахь.
Гьурттучитал ва хьхьичIунсса кIанттурду бувгьусса пишакартал барча буллай, «Успех» РМЦЗ-рал директорТамерлан Бугановлул чIа увкунни гихунмайсса бяст-ччаллавугу гьунарду аьлтту бансса тIайлабацIуртту ва чIал къавхьуну хьунтIисса IX-мур Миллатирттал чемпионатрал финалданийгу лайкьсса хIасиллу хьун даву.
Жагьилсса пишакартал барча буллалисса мажлисрай гьуртту хьунни заводирттал, предприятиярттал вакилтал ва пишардал усттаршиврун кьиматру бишлай бивкIсса экспертътал.
Шадлугърайн бувкIсса хъамаллуран ва гьурттучитуран ххаллилсса концерт ккаккан дунни колледжрал студентътурал.
ДакIнийн бутанну, март зурул 10-20-нний республикалий най диркIшиву 63 журасса пишалул усттаршиву ккаккан дуллалисса WorldSkills Russia -2021 Жагьилсса пишакартурал региондалул VI-мур чемпионат.
