Мартрал 29-нний Дагъусттаннал БакIчи Сергей Меликовлул каялувшиврий хьунни Наркотикирттайн къаршисса комиссиялул ярглийсса батIаву. Ва агьаммурну бия наркотикирттахун багьми хъин буллалисса паччахIлугърал бакъами идарарттал давурттал мюнпатшиврул ялув бацIаву.
Сергей Меликовлул тIимунийну, республикалул Наркодиспансерданул сияхIрай бусса бур 6,8 азарунная ливчусса инсантал. 100 азара инсаннан 132 наркоман хIисавну ур. 2020 шинал наркотикру машай буккан баврил аралуву дурну дур 2,7 азарда закон лиян даву, миннувату 800 хьуну дур захIматсса ва хъинну захIматсса. Му тагьардануву аьркинни, профилактикалул давурттаяр ххишала, наркотикирттахун багьми хъин буллангу, мукунна дачин дуван социал реабилитациялул давурттугу. Му мурадрай республикалий зий бур 75 койка бусса наркодиспансер, Къизлардал наркодиспансер 40 койка дузал бувсса стационарданущалсса, Дарбантуллал шагьрулул азарханалийгу бусса бур 7 койка бусса палата. Ми бакъассагу, наркологиялул кабинетру зий бусса бур республикалул шагьрурдал ва районнал 53 медициналул идаралий. Республикалул каялувчинал бувсунни мукунма уттигу бакIуйн буккан къабувну бушиву 2012 шинал буллай байбивхьуну бивкIсса Наркологиялул центр. Мукунма бакъар социал реабилитациялул даву дачин дайсса паччахIлугърал идарарттугу.
Ва тагьар тIайла дацIан даншиврул, Сергей Меликовлул ДР-лул ХIукуматрайн тапшур бунни наркотикирттахун багьминнал социал реабилитация буллансса республикалул Центр дузал баврил масъала хIадур буван.
Республикалул каялувчинал бувсунни мукунма наркомантал хъин буллалисса паччахIлугърал бакъами идарарттугу низамрайн буцин аьркинну бушиву.
Ххал бигьлагьисса масъалалул хIакъираву гьартану ихтилат бунни республикалул захIматрал ва социал лябуккулул министрнал хъиривчу Зураб БахIаммадовлул, коммерциялул бакъасса идарарттал правлениялул председатель Расим Аьлихановлул, ДР-лул виваллил иширттал министр Аьбдурашид МахIаммадовлул, республикалул цIуллу-сагъшиву дуруччаврил министр Татьяна Беляевал.
БатIаврил хIасиллугу дурну, цаппара тапшурлугъругу дунни ДР-лул БакIчинал.
