Расул ХIамзатовлун гьайкал дацIан дунни Египетнал хъуншагьрулийгу

Ларгсса бигьалагай кьини Египетнаву, Каирдай, Дагъусттаннал халкьуннал шаэр Расул ХIамзатовлун гьайкал дацIан дунни. Ва шадлугърай гьуртту хьунни Аьрасатнал вакил Георгий Борисенко, Египетнал хъуншагьрулул губернаторнал хъиривчу МухIаммад Султан, тайннал Культуралул министерствалул вакилтал, культуралул зузалт, художниктал, дипломатътал, журналистътал.

Шаэрнал бюст бувну бур египетнал художникнал, Аьрасатнал ва Совет Союзрал билаятрал вузирдал выпускниктурал ассоциациялул хъунама Усама аль-Серуил. Шагьрулул администрациялун бахшиш хIисаврай бувну бур бюст цуппагу. Гьайкал тIитIлатIисса шадлугърай Аьрасатнал вакилнал кIицI лавгунни ва Аьрасатнал ва Египетнал дусшиврийсса арарду цIакь дуллалисса давуну хьунтIишиву.