Лахьхьу Лакрал театрданул сахIналий хьунни «БурцIурдил хъатIи» тIисса Казбек Мазаевлул фантасмагориялул цIунил бивхьусса премьера.
[dropcap]П[/dropcap]ремьера байбишин хьхьичI театрданул каялувчи Бадрижат МахIаммадхIажиевал бувсуна спектакль цIу буккан бувшиву лакрал шаэр, чичу, таржумачи Казбек Мазаевлул оьрмулун 70 ва цIанихсса художник Эдуард Путерброт дунияллийн увккун 80 шин шаврил юбилейрдан хасну.
Дагъусттаннал Чичултрал союзрал хъунама МахIаммад АхIмадовлул кIицI лавгуна Казбек Мазаев ккалли хъанай ушиву ттизаманнул чичултраву ца яла гьунар бума чичуну.
«Казбек Мазаев хьуссар 90-ку шиннардий билаятрай хъанахъисса иширттая цалчин сивсуну махъ учинсса чичуну», – увкунни ванал.
Театрданул завлит, искусствовед Гулизар Султановал бувсуна Казбек Мазаевлул оьрмулул ва творчествалул ххуллия. Ихтилатру ялагу бувна ДГУ-лул профессор Х1ажи Мах1аммадовлул ва литературовед Ххазина Аминовал.
90-ку шиннардий кIия бюхттулсса гьунар бусса пишакарнал — режиссер Геннадий Якуниннул ва художник Эдуард Путербротлул цачIуну дунияллийн буккан бувсса ва хъинну хъунмасса тIайлабацIу буну най бивкIсса спектакль хьхьичIва бивхьумуницIун бавкьуну цIубуккан бувну бур Дагъусттаннал халкьуннал артист Аслан МахIаммадовлул. Шанна роль личIаннин, бурцIил роль дургьусса цува Аслан МахIаммадов, Ассадагурдул роль дургьусса Саният Рамазанова ва Бахтту-агъанал роль дургьусса ПатIимат Давидова, спектакльдануву гьурттуну бия цIусса актертал, щала труппа.
Агьамми роллу дургьуну бия Луиза Шагьдилова, Шамсуттин Къапланов, Сакинат МахIаммадова.
К. Мазаевлул «БурцIурдил хъатIуву» аьлтта чIалай дур ларгсса ттуршукулул ахирданийсса оьлуркъусса чIумул «перестройкалул» заманнул тагьар.
Жанавартрал персонажтал, магьлул сюжет, авадансса ва пасихIсса маз, ялтту нанисса махсара, жяматраву хъанахъимур, яргсса ва усттарсса актертурал тIуркIу цанницIун ца бавкьуну, ца гьавасрай, ссихI лавсун бигьиннин къуртал хьуна спектакль.
[dropcap]С[/dropcap]пектакль къуртал хьуну махъ Казбек Мазаевлул барчаллагь увкуна спектакль цIубуккан бувсса режиссернахь ва муниву гьурттусса цинявппагу актертурахь. ЧIурчIав дуруна Аслан МахIаммадовлул спектакль хъиннува мяъналул куртI бувну бушиву.
Спектакльдания балжину бусанну хъиривмур номерданий
