Апрель зурул кIинний Дагъусттаннал Журналистътурал союзрал ресторандалувун бавтIун бия лакрал интеллигенциялул ва хIукуматрал вакилтал, тамансса шиннардий Лакрал театрданул директорну, яла 25 шинай «Илчи» кказитрал хъунама редакторну зий бивкIсса миллатрал язисса душнил, Аьрасатнал культуралул лайкь хьусса зузала Качар ХIусайнаевал юбилей барча дуван.

[dropcap]Ш[/dropcap]адлугърал дайдихьу дуллалисса махъ лахълай, мажлис бачин бувсса, хIурмат лавайсса Шалласу Шалласуевлул тIийкун, лакрал маданиятрал кюртти – театрданунгу, кказитрангу цила оьр­му хас бувсса, 100 шинал хьхьичI Гьарун Саидовлул итабакьлай ивкIсса кказитрал ттугъ гьаз бувну най бивкIсса инсаннаха лайкьсса хIурмат буван.

ЧIявуя ва кьини Качар ХIусай­наевал гьунарданун, чувшиврун ва дакI аваданшиврун кьимат бишлашисса ихтилатру. Чан да­къая бахшишру, барча баврил адресру. ДР-лул Халкьуннал Мажлисрал председательнал хъиривчу Камил Давдиевлул Качардухьхьун буллуна Хизри Шихсаидовлул цIаниятусса Барчаллагьрал ча­гъаргу, каний дахIай ссятгу.

Дагъусттаннал печатьрал ва информациялул министр Оьмар­хIусман ХIажиевлул чIур­чIав дурна Качар ХIусай­наева Дагъу­сттаннал национал журналистикалул тарихрал щаллу-ккурккисса бутIану хъанахъишиврий, Дагъусттаннал тарихрал эпоха хъанахъишиврий.

– Качар Абачараевнан кказитрал редакторшиву дуллан багьссия аьратталсса ва авара­сса, маэшатрал кьянатсса шиннардий, рувхIанийсса цумур ххуллийх бачин аьркинссарив къабувчIлачIисса, ххараххуппа­сса заманнай. Ванища бювхъуна сантирай ва лябуккулий кказитрал даву дюхъан дуван, коллектив дузал бан, – увкуна цала ихтилатраву министрнал.
Да­гъусттаннал Журналистътурал союзрал председатель Аьли Камаловлул кIицI лавгуна Качар ХIусайнаеван, тIабиаьтрал буллусса гьунардацIун, чувшиврул бутIагу сахаватну буллуну бушиву, властирдал хъуними, хъуни къуллугъчитал бавтIсса кIанттурдай ванил цимилагу аьнтсса ихтилатру бувшиву, багьайний багьайкун махъ учайсса бивкIшиву.

Мариян Илиясовал цIанийсса «Дараччи» фондрал цIанияту барча буллай, фондрал хъунмур Гульшан Хасаевалгу бувсуна Качар ХIусайнаева «Дараччилул» фондрал вакил бушиврия пахру бушиву, ччимур публикалул хьхьичIун бувккун, кIивагу мазрай, оьрус ва лаккулий, пасихIну ихтилат бан шайсса, куртIсса кIулшивуртту дусса инсан бушиву. Ца зумату кунма, ва кьинисса ихтилатру бия Качар ХIусайнаеван захIмат-жапасса шиннардий кказит ччаннай бацIан буллан багьшиврия, щалва редакция цал ца кабинетравун бавкьуну, яла щалва издательствалийх ца-ца багьну зий бивкIшиврия, циняр захIматшивурттавату лайкьну бувкшиврия.

[dropcap]Ш[/dropcap]адлугъ ярг дурна Качардул кьини хъун дуван бувкIсса гьунар бусса балайчитуралгу: ХIажиаьли ХIажиаьлиевлул, Шагьалай МахIаммадовал, Рамил КьурбанмахIаммадовлул, Зумруд Мусиевал. Наставник ва хъунмур коллега барча буван балайрду куна Лакрал радиолул редакциялул хъунмур редактор Тамара Закарьяевал ва «Илчилул» зузала Аминат АхIмадовал.

«Илчи» кказитрал редакциялул цIанияту бусраврай ва барчаллагьрай кIицI лаглай буру Качар ХIусайнаевал юбилейрал чIарах бавцIусса жулва лакрал вакилтурал цIарду: Сиражуттин Илиясов, Ссапар Аьбдуллаев, Сайпуллагь Аьбдуразакьов, Жабир Абакаров, Камил Давдиев, АьвдурахIман ХIусайнаев, Султан ЦIаххаев, ХIасан-ХIусайн Камалов, Шихамир МахIаммадов, Рапи Абакаров, Шалласу Шалласуев ва Гульшан Хасаева.