Ларгсса нюжмардий Лакрал театрданул залдануву хьунни «Живая классика» тIисса цIанилусса щалва Аьрасатнал чIаважагьилтурал назмурду ккалаккисса Х-сса ятIап.
Ваний гьурттуну бия Дагъусттаннал сайки циняв шагьрурдаясса ва районнаясса оьрчIру. Конкурсрал сакиншинна дурну дия ДР-лул КIулшивуртту дулаврил ва элмулул министерствалул, ДИРО-рал ва Дагъусттаннал дуккаврил ва элмулул аралул зузалтрал профсоюзрал. Конкурсрал ятIап най дия кIива гьантлий. КIива гьантлул мутталий оьрчIал сахIналий ккаккан бувуна тамансса цавувасса гьунарду – кув бия пасихIну шеърирду ккалаккисса, кувгу личIи-личIисса классикалул ва уттизаманнул хавардава театрал журалийсса бутIри ккаккан буллалисса.
ОьрчIал гьунардай тамашалий ва вайннан лайкьсса кьиматру бихьлахьисса жюрилуву бия театрдал артисталгу, литературоведталгу, журналистал ва жяматийсса ишккаккултгу. Ххув хьуминнавух бия МахIачкъалалиясса, Южно-Сухокумскалиясса, Дарбантуллал райондалиясса дуклаки оьрчIру. Утти вай тIайла буккантIиссар Артекрай хьунтIисса Щалвагу Аьрасатнал конкурсрал ятIапрай гьуртту хьун.
Гьар шинах ва конкурс жула билаятрай дувайссар гьунар бусса оьрчIру ялун личин бувансса ва миннавун тамашачитурал хьхьичIун сахIналийн сивсуну буккан лахьхьин бансса мурадрай. Конкурсрал агьаммур мурадну тIурча, хъанахъиссар оьрчIаву луттирду, мяъна-мурадрал авадансса классикалул литература ккалансса гъира-шавкь рутаву.
