Дайдирхьунни республикалул конкурс «Шинал учитель – 2021»

Дайдирхьунни республикалул конкурс «Шинал учитель – 2021»

Апрельданул 5-нний МахIачкъалаллал 30-мур школа-лицейраву хьунни «Шинал учитель – 2021» тIисса, щалва Аьрасатнал конкурсрал республикалул даражалийсса ятIап тIитIлатIисса шадлугъ. Ванил сакиншинна дурну дия ДР-лул КIулшивуртту дулаврил ва элмулул министерствалул.

Конкурс дайдишин хьхьичI 30-мур лицейрал дуклаки оьрчIал хъамаллуран ва гьурттучитуран ккаккан дуруна хъун дакъасса ва тIайлабацIулунсса концертрал программа. Цала даврил уртакьтуран тIайлабацIу ва ххувшаву чIа учин шиккун бавтIун бия хьхьичIми шиннардий конкурсирттай ххув хьусса учительталгу, дахьва ва пишалухух лаглагисса жагьилсса учительталгу.
Гьарца шинах дувайсса ва конкурсрал мураднугу хъанахъиссар гьунар бусса, итххявхсса, цIушиннарду ишла дурну дарсру дишин хIарачат буллалисса ва учительнал пиша машгьур буллалисса педагогтал язи бугьаву.

Конкурс республикалул хъуншагьрулий нантIиссар апрельданул 5-9-ннин. Шиккун бувкIсса циняв учительтал зонардай ва муниципалитетирттай хьусса конкурсрал цалчинмур ятIапрай ххув хьусса гьурттучитал хъанахъиссар. МахIачкъалалив ххув хьума учитель гьуртту хьунтIиссар билаятрал даражалийсса конкурсрай.
Гьашинусса конкурсрай гьур­ттуну ур республикалул шагьрурдаясса ва районнаясса 26 учитель. Конкурсрал цалчинми тIалавшиннарду биттур дурну махъ 26 учительнава язи угьантIиссар 10. Ми 10 учитель цIанава хъанахъиссар конкурсрал лауреатътал.

Хъиривмур ятIапрай язи бувгьуминнал ккаккан бантIиссар мастер-классру ва гьуртту хьун­тIиссар цала пишалул бюхъу-хIарачатру ккаккан бансса цай­ми мероприятиярттайгу. ТIалавшиннарду биттур даврих бурувгун яла язи угьантIиссар махъра-махъсса ятIапрайнсса 5 учитель. Аьрасатнал учительтурал конкурсрайнгу тIайла уккантIиссар вайннава 1 учитель.

Читайте также: