Республикалул Культуралул министерствалул ва Республикалул Халкьуннал творчествалул къатлул сакиншиндарайну, Республикалул Композитортурал ва Музыкантътурал союзирттал гьурттушиврийну, МахIачкъалалив хьунни Республикалул хорданул «Возьмемся за руки, друзья!» тIисса цIанилусса фестиваль.

Мунил гьурттучитурахь ва хъамаллурахь ча бувкру тIий, ДР-лул культуралул министрнал хъиривчу – Республикалул Халкьуннал творчествалул къатлул директор Марита МухIадовал барчаллагь увкуна цинявннахь дурсса даврихлу ва чIа увкуна гихуннай дуллалимунивугу тIайлабацIу.
– Ва журалул шадлугъирттал зувун гихунмайгу зунсса, даврил кIулшивуртту кIидачIлансса гъира-гьавас бутлай бухьун­ссар тIисса умуд бур. Ччива репертуардануву, хьхьичIавами балайрдацIун, цIу-цIусса балайрдугу ххи хъанай. ХIарачат булувара зура дуллалисса давурттавух жагьилталгу хIала бакьлан, хъирив нанисса никираллича жулла аьдатругу, культурагу гихуннай дачин дуллантIисса, – увкуна ванил.

СахIналийн буклакиминнал гьунардан кьимат бишлай бия культуралуву ва искусствалуву цIарду дурксса пишакартал, республикалул культуралул лайкь хьусса зузалт.
Республикалул личIи-личIисса районнаясса коллективирттавух сахIналийн бувккуна Лакрал ва ЦIуссалакрал районнаясса хорданул коллективругу.
Фестивальданий гьуртту хьу­сса цинявппагу лайкь хьуна ДР-лул Культуралул министерствалул чулухасса дипломирттан.