Дагъусттаннал паччахIлугърал Технический университетраву хьунни республикалул социал-экономика сантирай ва лябуккулий хьхьичIуннай шаврил масъалартту ххал бигьлагьисса ккуркки стол. «Новые векторы экономического роста в стратегии социально-экономического развития Республики Дагестан-2030» тIисса цIанилу.
Мероприятиялул дайдихьу дуллалисса махъ лахълай, кIицI лавгсса вузрал ректор НурмахIаммад Суракьатовлул бувсунни экономикалул тема куртIну ххал дигьлагьисса цаймигу ккуркки столлу буван дакIний бушиву ва дайдихьу транспортрал комплексрал масъалартту гьаз буваврийну дуллалишиву. Республикалул ХIукуматрал хъунаманал цалчинма хъиривчу Нюсрет Оьмаровлулгу кIицI лавгунни социал-экономикалул тагьар гьаз дуваврил стратегиялуву гьанумур кIану Транспортно-логистический комплексрахь бушиву.
Дагъусттаннал промышленностьрал ва машлул министрнал хъиривчу ХIажимурад Исрапиловлул кIицI лавгунни цайми регионнащалгу экономикалул ва техникалул дунияллий хIала-гьурттуну зузаврия хайр бикIантIишиву. Бунни шикку транспортрал, машлул, таможнялул масъаларттая аьщуйн щусса докладру ва ихтилатру. Шиккува бусанна, вай гьантрай Железноводск шагьрулий, Ухссавнил Ккавкказуллал вузирдал элмулул ва кIулшивурттал хIала-гьурттушиву цIакь дуваву мурадрайсса кьутIигу чирчуну, хIасул дуршиву вузирдал Консорциум, мивун Дагъусттаннал Технический университетгу багьшиву ва тикку ва вузрал ректор НурмахIаммад Суракьатовгу гьуртту хьушиву.
