Дагъусттаннай хъаннил оьрму арамтуралмунияр 4,8 шинал лахъисса бур

Щалагу Аьрасатнал переписьрал хьунийн

Апрельданий билаятрал циняв регионнай дайдишинтIиссар Аьрасатнал агьалинал перепись. ЦIанакул най дуссар мунийнсса хIадуршиннарал давурттив. Ва иширайн бувну, бусанну жулламур республикалийсса статистикалул уттинин дурсса цаппара хъиривлаявурттаягу.
ЦIуллу-сагъшиврул ва агьалинал статистикалул отделданул хIасиллайн бувну, 2020 шинал январьданул 1-ннин жулла республикалий ялапар хъанай бивкIун бур 1607, 6 азарва хъамитайпа, вайннува 46 % яхъанай бусса бур шагьрурдай ва 54% щархъаву. Дянивну да­гъусттанхъамитайпалун дусса дур оьрмулул 34,3 шин ва яшай­сса бусса бур 81,4 шин хьуннин. Вай арамтураяр 4,8 шинал ххи­сса дусса дур.
Дагъусттаннал душру-хъами хъунмурчIин чIумуй цала кулпат бан , чIумуй нинухъру хьун ччи­сса, ужагърай нахIу-хIалашиву дан усттарсса бусса бур. Масалдаран, 2019 шинал дурсса хъиривлаявурттайн бувну, хъаннил 46,3% ташулул хьуну бур 20-24 шиннардиву, 20,5% оьрмулул 18-19 шиннардиву, 17,3% щар хьуну бур 25-29 шиннардиву.
Жулла республикалий 1000 адиминан хIисавну бур 1070 хъамитайпа. Арамтураяр хъами-душру чIявусса бусса бур 18 шин хьуния тихунмай.
Давурттаха зун-занан бю­хъайсса, цIуллу-сагъшиврул дирисса хъами жулла республикалий бусса бур 931734-ннийн бивсса.
2010 шинал дурсса щала Аьра­сатнал переписьрайн бувну, 1000 хъамитайпалува 136 хъамитайпа бивкIун бур 1 оьрчI бу­сса, 2 оьрчI бивкIун бур 209-ннил, 175-ннил бивкIун бур 3 оьрчI ва 162-ннил бивкIун бур 4 ва ххишаласса.
Дагъусттанхъамитайпа хъун­мурчIин дурккусса, цумур-бунугу пиша ласун кIулшивуртту ларсъсса бусса бур. Масалдаран, 1000 хъамитайпалийн багьлай бу­сса бур 18 кандидат ва 3 элмулул доктор хьусса хъами. Республикалул экономикалуву зий бусса бур жула циняв хъаннил 64, 2%. Ва ялагу, аьдатрайн бувну, жулла республикалий яла чIявуми хъами-душру зузисса арарду ду­сса дур кIулшивуртту дулайми ва цIуллу-сагъшиврулми.