Аьрасатнал Виричу, Да­гъус­ттаннал Росгвардиялул управлениялул хъунама полициялул генерал-майор МахIаммад Баачиловлул кьамул бунни агьали Аьрасатнал Президентнал жяматийсса приемнайлуву.

Ва кьини цала буруккин-масъаларттащал шиккун увкIун ия 20 инсан. ЧIявуми бия аьрали къуллугъ лавхъун махъ Росгвардиялул управлениялул подразделениярттаву зун ччисса жагьил­сса оьрчIру. Цаппара бия цайми регионнал подразделениярттаву къуллугъ буллалисса аьралитал, Дагъусттаннайн перевод бува тIий бувкIсса.
МахIаммад Баачиловлул бувсунни Росгвардиялул подразделениярттаву зун кьамул буллалиминная ва ца региондалия цамунийн бичлачиминная ци тIалавшинна дуссарив. Росгвардиялуву къуллугъ буллан ччиминнахь ванал маслихIат бунни собеседованиялийн гьан ва цIуллу-сагъшиврул хIадуршиндарал даража ххал бигьин.
КIанттул управлениялул ветерантурал тавакъю бия къатта-къушлил дузалшиндарал масъала щаллу бан кумаг бува тIисса.
Кьамул бувсса цинявннал суаллахьхьун жавабругу дуллуну, гьарица масъала хасъсса къуллугъирттайн тапшур бунни.