Мартрал 10-нний МахIачкъалалив «Молодежь Дагестана» кказитрал редакциялий 100-нния ливчусса республикалул журналистътурал оьтту буллунни, коронавирусрайн къарши дацIансса антитела дурив кIул даву мурадрай.

[dropcap]В[/dropcap]а иширал агьамшиву дурчI­лай, антитела ххал дан, оьтту булун бувкIсса бачIи журналистътурансса пробиркартту диял къашаврийн бувну, хъиривмур нюжмардий, март зурул 16-ннийгу, ливчIминнал оьтту ласун бувкIуна Республикалул оьтту булаврил станциялул зузалт. Оьтту буллуминнувасса чIявуминнал аьл­тту къархьунни антитела. Ларгмур нюжмардий оьтту буллусса ва антитела къаляркъусса 30-хъул журналистнал бунни вакцинарду. Ми бувминнавух бия «Илчи» кказитрал журналист Зулайхат Тахакьаева.

Ванияр хьхьичIмур нюжмардий вакцина бувссия «Илчи» кказитрал редакторнал хъиривчу Руслан Къардашовлул. КIицI лаганну, жулла цIуллу-сагъшиву вакциналийн хъар хъанахъишиву дурчIлачIисса журналистътал, аваза къабувну, вакцинарду бан хIадур хъанай бушиву. Ми бан рязисса журналистътал бур ва бала-хатIасса азар жухуннагу, жува хьунабакьлакьисса инсантурахунгу къадахчиншиврий, дак1 дарц1уну бикIан ччай буру тIий. Вакцинарду буллали­ссар уква ва цала хушрай. Утти­нин ми бувсса журналистътал ххуйну бур ва миннал цIуллу-сагъшиврийн цукунчIавсса зарал биллай бакъар.