Март зурул 2-нний хьусса Федерациялул Советрал Социал политикалул хIакъиравусса комитетрал заседаниялий гьаз бунни Дагъусттаннал агьалинал цIуллу-сагъшиву дуруччаврил масъалартту.
Заседаниялий гьуртту хьунни Федерациялул Советрал Председательнал хъиривчу Илияс Умаханов, Федерациялул Советрал Социал политикалул хIакъиравусса комитетрал Председатель Инна Святенко, Дагъусттаннал ХIукуматрал Председательнал хъиривчунан кIанайсса Анатолий Карибов, Дагъусттаннал Халкьуннал мажлисрал ЦIуллу-сагъшиву дуруччаврил ва социал политикалул комитетрал председатель Висампаша Ханалиев.
Ихтилат бунни Дагъусттаннал цIуллу-сагъшиву дуруччаврил министрнан кIанайсса Татьяна Беляевал.
Цила ихтилатраву ванил гьаз бувсса агьаммур масъала бия Дагъусттаннай медициналул зузалтрансса штатру ххишала баву.
Татьяна Беляевал бусласимунийн бувну, Дагъусттаннай агьалинан анаварсса медициналул кумаг баврил тагьар ххуйну дакъар, биялсса бригадартту бакъашиврийн бувну.
– ЦIанасса чIумал республикалий анаварсса медициналул кумаг байсса 189 бригада зий бур.
Чанва-чанну аьркинну бур 262 бригада. Анаварсса медициналул кумаграл дузалшинна жучIара дур 10 азара инсаннан – 0,6. Дянивну Аьрасатнавусса показательлу дур 10 азара инсаннан – 2,1. Дагъусттаннай 73 бригада ххишалану зузи бан аьркинну бур. Ми щаллу бан 1095 инсаннансса штатру тIитIин аьркинну бур, – бувсунни министрнал.
Бюджетрал организациярдай зунминнал штатру ххишала бан Аьрасатнал Финансирттал министерствалул рязишинна аьркинну душиврийн бувну, ванил оьвчаву дунни министерствалийн ва масъала дузрайн буккан бан кабакьу бувара тIий.
Ва масъала щаллу хьурча, агьалинан анаварсса медициналул кумаг баврил даража ххуй хьунссия, медициналул зузалт къашавайминначIан чIал къавхьуну бучIаванссия.
Цила ихтилатраву Беляевал кIицI лавгунни Дагъусттан Аьрасатнаву яла оьрчIру чIявусса байсса субъектирттавасса ца бушиву.
Мукунма ванил кIицI лавгунни Дагъусттаннал агьали оьрму лахъисса бушиву. Му чулуха жула республикалул билаятрай 2-мур кIану бугьлай бушиву (Ингушетиянал хъирив).
Министрнал гьаз бувсса масъалартту кьамул бунни Федерациялул Советрал Социал политикалул хIакъиравусса комитетрал.
