Мартрал 2-нний Дагъусттаннал БакIчи Сергей Меликов гьуртту хьунни Федерациялул Советрал Экономикалул политикалул комитетрал гьартасса батIаврий. Муний ххал бигьлай бия республикалий дуллай дачIину лирчIсса объектру арцул дузал баврил масъала.
Муния ихтилат бунни ДР-лул экономикалул ва территориярттал лябуккулул министр Руслан Аьлиевлул. Мунал тIимунийну, бакIуйн дуккан дурасса объектру дусса дур сайки циняв кIанттурдай. 2020 шинал январьданул 1-нний республикалий диркIун дур дуллай дачIину лирчIсса 1354 объект, ми аьмну дацIлай дур 41,4 млрд къурушран. Миннувату чIяруми дусса дур федерал бюджетрал арцух дуллай дайдирхьусса хъунисса объектру. Федерал программартту бартбивгьуну къуртал хьунутIий, ми объектру дачIину лирчIун дур арцу дучIан дансса кIанттурдацIа хьуну. Республикалуща бюхълай бакъасса бур цила бюджетрал арцух ми объекру дузрайн дуккан дуван. Миннувату приоритетссаннун ккаллину дусса дур 14 объект.
Минэкономразвитиялул бакIчинал бусаврийну, цIанасса ппурттуву хIукмурду хьуну бур къуртал къадурсса 5 объектрал хIакъираву. Ми дакъассагу, АьФ-лул Экономикалул лябуккулул министерствалул «Ухссавнил Ккавкказуллал федерал округрал лябукку» тIисса Аьрасатнал паччахIлугърал программалул подпрограммалувун хIала даркьуну дур 4 объект «МахIачкъала – Каспийск – Избербаш» тIисса щинаххуллу ва Хасавюртливсса, Дагестанские Огнилийсса ва Буйнакскалийсса щин марцI дайсса сооруженияртту. ЛичIину хIадур буллай бур МахIачкъалаллал коллектор къуртал баврил масъала.
